Viafier retica preschenta novs trens per lingia d'Alvra

La Viafier retica ha preschentà in nov tren per la lingia da l’Alvra a chaschun da sia conferenza da medias annuala. A partir da l’avust 2016 duai quest tren charrar sin il tschancun tranter Cuira e San Murezzan. L’onn da fatschenta actual da la RhB è marcà da la situaziun turistica tendida.

Laschar ir video «Nov tren per la Viafier Retica»

Nov tren per la Viafier Retica

1:47 min, Actualitad video dals 14.12.2015

Avant paucs dis ha il constructur Stadler Altenrhein furnì l’emprima cumposiziun dal nov tren a Landquart. En tut ha la RhB cumprà sis trens à mintgamai set parts.

En funcziun a partir da stad 2017

Il nov tren resguarda ils basegns da persunas cun impediments tenor lescha. Plinavant ha il tren in cumpartiment per uffants ed in per fotografs cun fanestras da panorama.

La primavaira 2016 cumenzan ils viadis da test, avant che l’emprim tren cursescha lura a partir da l’avust 2016 tenor plan.

Si e giu en l'onn da fatschenta 2015

L’onn da fatschenta actual è marcà dal ferm franc sco era dal turissem flaivel, communitgescha la Viafier retica. Perquai fa l’interpresa quint cun in minus da las entradas da radund 3 milliuns francs per la sparta dal traffic da persunas (-3 fin 4%). Malgrà questa sperdita duai il quint esser levamain positiv.

Auter vesa quai ora per il transport da rauba: Qua spetga la RhB in lev augment d’in mez milliun francs cumpareglià cun l’onn avant. Areguard il transport d’autos duain las cifras da l’onn passà vegnidas cuntanschidas.

Projects gronds van avant tenor plan

Plinavant communitgescha la Viafier retica ch’ils projects gronds van avant tenor plan. Quai pertutga la construcziun dal nov tunnel da l’Alvra, tar la quala las lavurs èn tar radund 210 meters a Preda e radund 80 meters a Spinas.

Er la sanaziun dal tunnel da Glatschera va bain enavant, ha fatg a savair l'interpresa. Il project da pilot custa ca. 17 milliuns francs. La reconstrucziun da la staziun a San Murezzan duai esser terminada il 2017 fin il campiunadi mundial da ski alpin. Ella custa totalmain 67 milliuns francs.

Il nov tren en cifras

  • plazs 1. classa: 90
  • plazs 2. classa: 217
  • per sutgas cun rodas: 4
  • tualettas: 6
  • plazs per velos: 14