Siglir tar il cuntegn
cuntegn

Chantun Vespras tut a dubel ...

Quest onn datti, sco i para, bleras vespras. Quai na pon ni il Plantahof ni l'Uffizi per la natira ni Agroscope confermar, dentant ils cumbattants da parasits.

Ina vespra sin l'ur d'ina buttiglia.
Legenda: Las vespras han gugent dultsch, savens hai num dar adatg da betg survesair ellas sin buttiglias. Keystone

Tant il «Insektenkiller» da Domat sco era Robert Cathomas cun interpresa a Glion han bler da far pervi da vespras. Sco Robert Cathomas di, sto el ir tranter 10 e 20 giadas per di a dismetter vesprers. Tscherts vesprers possian ins tissientar sez. Dentant sch'ins na po betg tiers il vesprer, perquai ch'el è en in lieu malsegir ubain sch'ins è allergic, saja meglier da clamar l'expert.

Alternativa tar il tissi

I dettia era la pussaivladad da dischlocar il vesprer. Quai saja dentant da far la notg, perquai che las vespras sajan lura en il vesprer. Ed ins stoppia metter il vesprer plirs kilometers davent per che las vespras stettian era davent, di Ueli Rehsteiner, directur dal Museum da la natira a Cuira. El declera era, pertge ch'i ha insumma tantas vespras. Durant il davos enviern miaivel n'èn betg tantas reginas mortas, uschia ch'ellas han pudì fundar suenter l'enviern blers novs pievels.