Siglir tar il cuntegn
Inhalt

Chantun Vender e posiziunar meglier ils products gia existents

Als hotels grischuns mancan mintg’onn bun 1,6 milliuns pernottaziuns per pudair garantir a lunga vista lur surviver. Grond potenzial dad ir per dapli giasts dessi la stad, cunzunt per giasts da l’Europa. In studi dal Forum economic dal Grischun mussà ina u l’autra via co i fiss da far quai.

In document.
Legenda: Tenor il studi ston ils numerus products grischuns l'emprim vegnir chanalisads. RTR, G. Caviezel

Vender e posiziunar meglier ils products gia existents sin las fieras europeicas: quai è il facit dal studi «Attracziuns da stad per giasts da l'Europa» ch'il Forum economic dal Grischun ha preschentà il mardis.

Pertge là n’è betg mo il potenzial da carmalar giasts da l'Europa en il Grischun pli gronds, mabain igl è era pli simpel che vulair crear novas grondas attracziuns en il Grischun, di Peder Plaz, il manader da fatschenta dal Forum economic dal Grischun.

En 5 minutas savair tge che vegn purschì

Ils numerus products ch'i dat gia en il Grischun, ston tenor il studi dentant l'emprim vegnir chanalisads. E quai bain uschia ch'ils giasts che n’enconuschan betg anc il Grischun, pon en pli pauc che 5 minutas mirar tge vacanzas che vegnan insumma tut purschidas qua.

«Inventar da nov las vacanzas da stad», manegia Peder Plaz. «Pia vegnir davent dal concept ch’insatgi reserva vacanzas en ina regiun e va lura là per exempel cun velo ni per las muntognas, mobain las vacanzas da stad ston daventar in eveniment sur pliras destinaziuns per carmalar dapli giasts da l'Europa la stad.»

Crear products gia predefinids

Impurtant saja qua da crear products gia predefinids, che respectian ils giavischs dals giasts da l'Europa. Per exempel da porscher viadis atras il Grischun cun in per highlights culturals e culinarics, sco era in per causas da far sport. Per avair success, stuessan quels products predefinids, dentant era vegnids purschids en l'avegnir, sin tuttas plattafurmas da viadis e vacanzas relevantas da l'Europa, di Peder Plaz, il manader da fatschenta dal Forum economic dal Grischun.

Betg la forza per novs gronds products

Da crear grondas novas attracziuns, per augmentar uschia las pernottaziuns la stad sin 1 fin 1,6 milliuns, fiss tschella opziun. Dentant è quella sa mussada sco pli pauc realistica, conferma Peder Plaz.

Per vegnir en ina liga da pudair concurrenzar cun auters products europeics, duvrass quai grondas investiziuns – per part da pliras milliuns francs. «Tut ils products che nus avain guardà ch’ins pudess far en il Grischun, han demussà ch’els èn relativ grev da realisar en il Grischun», manegia Peder Plaz ed el na crai betg ch’il Grischun ha la forza il mument era d'insumma pudair far da quels products.