Siglir tar il cuntegn
cuntegn

Chantun Vaglias da BCG: 30% damain valur

Anc en schaner sa pajeva sur 1'800 francs per in scrit da partizipaziun. Als 15 november era quel pretsch 1'270 francs. Pertge cha'l curs è ì sche ferm aval stà en relaziun cun la vendita dals scrits.

Logo da la banca chantunala Grischuna
Legenda: Ils scrits da partizipaziun da la banca chantunala Grischuna han pers ferm da valur. RTR, F.Cajochen

750'000 scrits ha la Banca Chantunala Grischuna (BCG) totalmain. Da quels vegnan però be radund 5% (ca. 40'000) cumprads u vendids mintg'onn.

Perquai che quai n'è betg bler, na dovri era betg blers scrits per midar il curs. 15 scrits da partizipaziun tanschan per influenzar il curs. Tenor l'expert da finanzas Damian Gliott han gist ussa diversas persunas vendì lur scrits, perquai va il curs engiu.

Pertge gist ussa?

Il schaner da quest onn era il curs extrem aut. Tenor Damian Gliott han blers possesurs pensà ch'il curs na giaja betg pli ad aut. Per far usche bler profit sco pussibel han els vendì lur scrits da partizipaziun. Perquai che blers han vendì lur scrits è lura il curs ì engiu.

Naginas grondas consequenzas

Grondas consequenzas na datti betg, ni tar la BCG, ni tar ils possesurs da scrits. La dividenda da 38 francs per scrit vegn er vinavant pajada ora. Tenor Damian Gliott e la BCG datti tar vaglias adina puspè midamaints dal curs.

RR actualitad 06:00