Siglir tar il cuntegn

Header

squitta d'injecziun.
Legenda: Cunzunt per trais gruppas da persunas èsi necessari da laschar vaccinar cunter la grippa. Keystone.
cuntegn

Vaccinar u betg? Quant effectiva è la vaccinaziun cunter la grippa?

I dat da tuttas sort vaccinaziuns. Tranter auter era cunter la grippa. Quant effectiva è quella e per tgi è ella adattada? La media da chasa e vicepresidenta da l'uniun da medis grischuna Edith Oechslin dat scleriment.

La vaccinaziun da la grippa na protegia betg 100% cunter la grippa, di la media Edith Oechslin. Blers studis mussan che la protecziun è tranter 30% – 70%. Dentant datti era studis che sminan ch’i dettia dapli segirtad.

In avantatg per bleras persunas

Mintgin po profitar da la vaccinaziun cunter la grippa. Tenor Edith Oechslin han cunzunt trais gruppas da persunas basegn da la vaccinaziun cunter la grippa:

  • persunas che lavuran en il sectur da la sanadad
  • persunas che vulan evitar d'infectar autras persunas (p. ex.: geniturs d'uffants pitschens)
  • persunas malsaunas cronicamain (malsognas dal cor, dal lom, diabetes etc.) sco er persunas ch'èn 65 onns e pli veglias

Ina grippa pli miaivla

Per persunas ch'han gia ina malsogna è la vaccinaziun impurtanta. Edith Oechslin declera dentant che talas persunas pon malgrà la vaccinaziun tuttina survegnir la grippa. Il sistem d'immunitad da talas persunas saja numnadamain pli flaivel che quel da persunas saunas. Tuttina sa era la vaccinaziun gidar persunas malsaunas cronicamain e persunas pli veglias: Sche talas persunas survegnan lura anc la grippa, lura è quella savens pli miaivla ed ils effects negativs suenter la grippa sajan strusch da sentir.

RR actualitad 08:00