Siglir tar il cuntegn

Header

audio
Corona e vacanzas da stad: Grischuns spetgan anc cun cudeschar
Or da Actualitad dals 20.05.2020.
laschar ir. Durada: 02:22 minutas.
cuntegn

Vacanzas da stad Grischuns spetgan anc cun cudeschar vacanzas sur biros da viadi

Blers biros da viadi en il Grischun n'han paucas fin insumma naginas novas cudeschaziuns dapi ch’igl è cler ch’ils cunfins vegnan puspè averts il zercladur – ma l'interess creschia, hai num almain tar in u l'auter.

Fin uss han ils biros da viadi plitost da stornar che da cudeschar vacanzas. Rosmarie Cavigelli, dal biro da vacanzas «BLT buna luna» ad Igis manegia che blers na sappian betg nua ch’els veglian e possian insumma ir en vacanzas. Vinavant na crai ella betg che l’interess vid far vacanzas en Svizra creschia uschè spert.

Tge che vegn vitiers tenor Renate Reinbacher da ART-Tours a Scuol è che blers cudescheschian sez lur vacanzas sch’els stettian en Svizra u giajan mo en ils pajais vischinants.

Perquai na savain nus betg quant bler ch’igl è vegnì reservà u betg.
Autur: Renate Reinbacherbiro da viadi ATR-Tours a Scuol

Era tar il biro da viadi Roth a Cuira che porscha viadis cun car na vesi betg ora bain. Ma il manader Claudio Frick di ch’ins sentia che la glieud haja plaunet puspè interess vid cudeschar vacanzas. Il medem constatescha er il biro da viadi Kuoni. Il pledader da medias, Markus Flick di ch’ils Svizzers hajan grond interess cura e nua ch’ins possia ir en vacanzas.

Giorgio Leoni da Luxury Travel a Tavau agiunta che la fulla da glieud che less cudeschar na saja betg vegnida sco quai ch'ins haja spetgà.

Pia, igl è anc memia baud per pudair dir nua ch’ils Grischuns vulan ir en vacanzas.

RTR actualitad 07:00