Siglir tar il cuntegn
Inhalt

Chantun Uvestg Huonder: Cunter trend da murir ord atgna voluntad

En il predi da la messa pontificala da la dumengia da Pasca è l'uvestg Vitus Huonder s'exprimì fermamain cunter il trend da far sez ina fin a la vita e murir ord atgna voluntad cun l’agid d’organisaziuns sco Exit.

cruzifix cun jesus e la sedia da l'uvestg
Legenda: Jesus Christus sto tenor l'uvestg Vitus Huonder esser l'exempel era en chaussas da la mort. Keystone

Da vulair decider sez sur da l'ura da nossa mort, quai cuntrafetschia a la cardientscha cristifidaivla.

Nus stain oz avant ina nova cultura dal murir, avant ina nova ideologia da la mort.
Autur: Vitus HuonderUvestg da Cuira

Il patratg da sez pudair dir, cura che la fin è qua, saja bain calmond, ha ditg l’uvestg Vitus. El ha dentant accentuà quant van che quest patratg è. Sez pudair definir il punct da la mort garanteschia era da pudair sa profilar fin la fin avant tuts sco impurtant ed admirabel.

Na persequitai betg ina tala ideologia. Nossa cardientscha na permetta betg quai. Ils dis da Pasca stattan en ferm cuntrast tar quai.
Autur: Vitus HuonderUvestg da Cuira

Jesus Christus stoppia esser l'exempel. Era en chaussas da la mort. Jesus ha fin sia ultima fladada surlaschà ses destin a Dieu Bab. Senza quai na pudessan ils cristifidaivels betg celebrar la festa da Pasca. Uschia ha uvestg Vitus concludì sia pregia da la messa pontificala da la dumengia da Pasca.

Betg occupada dal tut

Da quai da 250 cartentas e cartents han fatg part a la ceremonia. Dal tut occupada n'era la catedrala da Cuira dentant betg. 70 da las sutgas supplementaras ch'èn vegnidas messas ora aposta per la messa pontificala èn restadas vidas.

La messa è vegnida celebrada da l'uvestg Vitus Huonder e dal canoni Gion Luzi Bühler ed è vegnida embellida dal chor da la Catedrala cun orchester e solists sut direcziun dal directur musical da la catedrala Andreas Jetter.