Siglir tar il cuntegn

Header

cuntegn

Chantun Urs Marti fa suar il Cussegl grond

Igl è stà ina lunga debatta – per part emoziunala. Surtut il president da Cuira Urs Marti n'ha betg chalà da crititgar la regenza grischuna per ses agir en connex cun l'areal da la resgia gronda a Domat. Ses adversaris han rinfatschà ad el scuidanza.

Il Cussegl grond ha debattà davart in rapport da la cumissiun da gestiun, che ha analisà l'agir da la regenza avant in onn e mez, cura ch'ella aveva decidì da cumprar ils dretgs da bajegiar per l'areal da la resgia gronda a Domat per 10,8 milliuns francs.

La cumissiun da gestiun vegn a la conclusiun ch'i sajan bain capitads sbagls – en general haja la regenza dentant agì correctamain.

I dat suspects, che la regenza è vegnida manipulada.
Autur: Urs Marti president da Cuira e deputà da la PLD

Il president da Cuira Urs Marti (PLD) fa rinfatschas massivas: Tranter auter pretenda el, che la regenza n'haja gì nagin squitsch da cumprar uschè spert ed uschè char ils dretgs da bajegiar. Che la firma Hamilton haja smanatschà dad ir en l'exteriur sch'ella na survegnia betg l'areal a Domat saja ina manzegna.

audio
Bunura: Ina debatta plain reproschas ed emoziuns
ord Actualitad dals 14.06.2017.
laschar ir. Durada: 3 minutas 53 Secundas.

Il president dal Cussegl grond, Michael Pfäffli (PLD), ha stuì admonir pliras giadas a ses collega da partida, perquai ch'el ha discurrì memia ditg e memia savens.

«La regenza sto vesair il niz per l'entira economia»

Il cusseglier guvernativ Jon Domenic Parolini (PBD) è sa dustà: Er sch'i saja stat ina fatschenta extraordinaria e pretensiusa, haja la regenza agì per il bun da l'entira economia publica dal Grischun cun cumprar ils dretgs da bajegiar da la firma Pfeifer l'october 2015.

Nus quintain cun bun milli plazzas da lavur.
Autur: Jon Domeni Parolini cusseglier guvernativ (PBD)

Ina giada che l'entir areal d'industria a Domat saja surbajegià quinta Parolini cun 1'000 enfin 1'500 plazzas da lavur. Quai fiss ina creaziun da valur da brutto 240 milliuns francs ad onn.

Strapatschà la gnerva da deputadas e deputads

Deputadas e deputads da la PPS, PCD e PS han bain era crititgà tschertas decisiuns da la regenza – han dentant accentuà, che la cumissiun da gestiun haja analisà l'agir, haja plazzà sia critica e ch'i saja uss temp da metter ad acta quest tema.

Get over it.
Autur: Conradin Caviezel deputà da la PS

Plirs deputads han plinavant rinfatschà ad Urs Marti, ch'el saja anc adina frustrà perquai che la firma Hamilton haja decis da bajegiar sia fabrica a Domat e betg a Cuira. Quai ha il president da la citad dentant betg laschà valair.

Suenter ina debatta da trais uras ha il Cussegl grond prendì per enconuschientscha il rapport da la cumissiun da gestiun.

RR novitads 06:00+

Artitgels legids il pli savens