Sulet in punct en la lescha ha provocà in zic discussiuns en il Cussegl grond: Ina minoritad da PS e PCD han vulì fixar il minimum sin dus onns e lura surlaschar a las vischnancas sch'ellas vulan auzar il temp da dimora sin 5 onns. Questa proposta n'ha dentant gì naginas schanzas.
Finamira: Far urden e modernisar
Actualmain han las vischnancas grischunas fitg differentas pretensiuns cura ch'ina persuna survegn il dretg da burgais. Per part vegn pretendì be 4 onns domicil en il lieu e per part perfin 12 onns.
La Confederaziun prescriva ussa in minimum da 2 ed in maximum da 5 onns - la pretensiun concreta pon ils chantuns fixar en lur leschas. La regenza grischuna propona il maximum.
Per survegnir il dretg da burgais...
- sto ina persuna da l'exteriur avair minimalmain 5 onns ses domicil en il lieu.
- sto ina persuna svizra avair 2 onns ses domicil en il lieu.
- sto la persuna avair enconuschientschas a scrit ed a bucca dad ina lingua chantunala (rumantsch, talian u tudestg)
La revisiuin totala dal dretg da burgais è stada necessaria, surtut perquei che la Confederaziun ha revedì sia lescha davart il dretg da burgais. Era l'Associaziun da las vischnancas burgaisas è da principi cuntenta cun la revisiun.
Lieu da burgais: Scuol (Sent)
In'ulteriura finamira è da reducir las discussiuns emoziunalas tar fusiuns da vischnancas. Cun ina fusiun sa mida numnadamain il lieu da burgais e quai disturba tschertas persunas. Da nov duai esser pussaivel d'inditgar il lieu da burgais origin en parentesas. Per in burgais da Sent fiss quai lura: Scuol (Sent).
Cura ch'jau dovr in nov pass, lasch jau forsa metter en Sent en parentesas.
Ina pitschna retschertga dad RTR en la vischnanca fusiunada da Scuol mussa: Blera glieud ha gust da l'idea d'avair la pussaivladad da menziunar il lieu da burgais origin.
RR actualitad 07.00
