Siglir tar il cuntegn

Chantun Ulteriura denunzia cunter l’uvestg Vitus Huonder

Sper Pink Cross, l'organisaziun tetgala dals omosexuals en Svizra, ha era ina persuna privata dal chantun Son Gagl inoltrà ina denunzia penala cunter l'uvestg da Cuira Vitus Huonder.

L'uvestg Vitus Huonder il zercladur 2013.
Legenda: La critica cunter l’uvestg Vitus Huonder na prenda nagina fin. Keystone

Quella rinfatscha a Huonder d'avair appellà publicamain a crims u a violenza. Quai ha la procura publica dal Grischun confermà a l'agentura da novitads sda.

La denunzia sa referescha sin in referat che Huonder ha tegnì en Germania. Il referat aveva chaschunà indignaziun tranter ils crettaivels liberals.

Sche Huonder vegniss propi sentenzià, stuess el quintar dad ir fin 3 onns en praschun. Cuntrari a politichers u derschaders n'èn uvestgs betg immuns cunter persecuziun penala en Svizra.

RR Novitads 15:00