«Mitsprache bei wichtigen Bildungsfragen» sa numna l'iniziativa da constituziun, «Mitsprache bei Lehrplänen» quella da lescha. Quellas duas iniziativas ha il il comité da la gruppa «buna scola Grischun» preschentà oz a las medias.
Cun quellas vul la gruppa surdar la cumpetenza da decider en dumondas da la scola populara al Cussegl Grond enstagl da la regenza. Uschia possia er la populaziun far tenor basegn in referendum facultativ ed avair in pled en chaussa, han ditg ils iniziants.
Vegnidas lantschadas èn las iniziativas cunzunt per cumbatter il plan d'instrucziun 21. «Buna scola Grischun» è fitg critic envers il nov plan d'instrucziun e vul cun l'iniziativa - sche pussaivel - anc franar quel. Er sche quel duai vegnir introducì l'onn da scola 2018/19 en las scolas grischunas.
Ils iniziants preschentan fauss fatgs.
Per il minister d'educaziun grischun Martin Jäger rimnia la gruppa suttascripziuns cun preschentar a la populaziun fatgs fallids. En l'argumentaziun dal comité saja per exempel scrit che la regenza possia reglar l'introducziun da linguas estras.
Quai na saja betg uschia, la regenza na possia betg simplamain far quai ch'ella veglia. Quai exempel saja reglà en la lescha da scola e saja vegnì decidì dal Cussegl grond, uschia ch'i avess dà la pussaivladad da far in referendum. Ed er la cumpetenza da decider davart il plan d'instrucziun 21 haja la regenza survegnì dal Cussegl grond, uschia Jäger.
LEGR: «Iniziativa vegn memia tard«
La magistraglia grischuna LEGR è medemamain cunter l'iniziativa dubla che sa drizza cunter l'introducziun dal plan d'instrucziun 21. Il plan d'instrucziun 21 correspundia ad ina adattaziun contemporana da la materia da scola, hai num en la communicaziun.
La magistraglia grischuna saja da principi per la realisaziun concreta da quel. Tgi che lintscheschia oz ina iniziativa cunter il plan d'instrucziun 21 vegnia memia tard.
L’iniziativa dubla n'haja betg la pussaivladad da cupitgar d'in mument sin l'auter la decisiun da la regenza. Uschia saja cler che quel vegnia lantschà il proxim onn da scola e fin ch'il pievel possia decider saja quel gia daditg introducì.