Siglir tar il cuntegn

Header

audio
Mezdi: Sajettar lufs – Quai di Adrian Arquint
Or da Actualitad dals 04.10.2019.
laschar ir. Durada: 3 minutas 38 Secundas.
cuntegn

Triep al Beverin Chantun lascha sajettar quatter lufs

A partir da quest venderdi po il chantun Grischun sajettar quatter lufs dal triep dal Beverin. Ils animals creschids ston dentant vegnir schanegiads. L'Uffizi federal d'ambient ha dà la lubientscha da regular la populaziun en il massiv dal Beverin.

Adrian Arquint, il manader da l'Uffizi da chatscha e pestga, para cuntent cun la decisiun da l'uffizi federal.

Quest onn avain nus propi vesì, ch'in triep mussa in cumportament problematic. Els èn ids sur saivs. Là ston ins intervegnir. Quai prescriva er la lescha.
Autur: Adrian Arquint Manader Uffizi da chatscha e pestga

Emprovas da DNA han mussà ch'il luf masculin creschì or da quel triep ha stgarpà questa stad almain 15 chauras en la regiun Mantogna e Stussavgia. Cun quai saja la limita che classifitgeschia il cumportament dal triep da lufs sco «problematic» vegnida surpassada.

audio
Daco duain vegnir sajettads quatter pitschens e betg il luf masculin creschì?
ord Actualitad dals 04.10.2019.
laschar ir. Durada: 34 Secundas.

Gia l'onn passà era il luf masculin dal triep crudà si negativ, cura ch'el aveva stgarpà ina rotscha nursas sin la Stutzalp sur Spleia. Il cumportament saja uss vegnì dà vinavant als pitschens. Era lufs da quest triep han, tenor l'Uffizi da chatscha, probablamain attatgà e stgarpà questa stad in quart da la muntanera da nursas sin l'Alp Pitasch.

Triep al Beverin

Avrir la box Serrar la box

Il triep era vegnì confermà il fanadur da l'Uffizi da chatscha. Da curt era quel triep dad 11 lufs vegnì observà en la Val Stussavgia. I sa tracta probabel da dus creschids e nov pitschens.

video
Qutter lufs giuvens dal Beverin pon vegnir sajettads
Or da Telesguard dals 04.10.2019.
laschar ir. Durada: 2 minutas 42 Secundas.

Co vinavant?

Tenor Adrian Arquint sa prepara l'uffizi uss per sajettar ils quatter lufs. Quai na vegnia betg ad esser simpel, manegia el. Per els saja uss fitg impurtant, ch'els possian reagir svelt. Ils giuvens creschian numanadamain fitg spert.

La gronda difficultad da quest'acziun è, da differenziar ils lufs giuvens dals lufs vegls. Quai vegn adina pli difficil sch'i vegn enviern.
Autur: Adrian Arquint Manader Uffizi da chatscha e pestga

Cunter la lubientscha pon las organisaziuns d'ambient anc far recurs aifer ils proxims 30 dis. Tenor il manader da l'Uffizi da chatscha na spetgan ins dentant betg quels 30 dis per cumenzar lur acziun.

Betg l'emprima giada

Avrir la box Serrar la box

Er ils onns 2016 e 2017 ha il chantun survegnì la lubientscha da sajettar singuls lufs.

Uschia è quai stà il cas tar il triep dal Calanda, nua ch'i n'è betg gartegià da sajettar u tar il luf ch'ha stgarpà nursas en la Leventina, il Mesauc e la Bregaglia – er quel è mitschà.

RR novitads 08:00++

Artitgels legids il pli savens