La Baselgia catolica dal chantun Grischun na dastga vinavant betg sustegnair finanzialmain il post da cussegliaziun per la planisaziun da famiglia «Adebar» a Cuira. Il Tribunal federal ha decidì ch’il recurs da l’uvestgieu da Cuira haja in effect suspensiv. Decidì el conflict tranter las duas partidas han ils derschaders a Losanna dentant anc betg.
Dispita dapi il 2012
Concret vai per 15’000 francs che la Baselgia catolica dal Grischun dat mintg’onn al post da cussegliaziun «Adebar». Quai cun la cundiziun che quels daners na vegnan betg duvrads per la cussegliaziun en cas d’aborts. A l'uvestgieu na plascha quai betg. Gia dapi sis onns emprova lez da stritgar quellas contribuziuns. Quai cun l’argument che la cussegliaziun dad «Adebar» en ils secturs prevenziun da gravidanza, inseminaziun artifiziala ed educaziun sexuala na saja betg cumpatibla cun la ductrina catolica.
Daners van vinavant sin in conto separà
Tenor Marcus Caduff, il president dal Corpus catholicum (parlament da la Baselgia catolica dal Grischun), na mida la decisiun dal Tribunal nagut vid la situaziun actuala. Dapi l’entschatta da la dispita na vegnan ils daners betg pli pajads ora ad «Adebar» mabain rimnads sin in conto separà.
RR actualitad 17:00
