Siglir tar il cuntegn

Chantun Transparenza e vias fatschentan il Cussegl grond

Deputadas e deputads dal Cussegl grond discuteschan dus temas pli gronds en la sessiun da primavaira: La lescha da transparenza ed il program da vias 2017-2020. Plinavant stattan 17 incumbensas e dumondas sin la glista da tractandas.

Il maletg mussa la sala dal cussegl grond a Cuira.
Legenda: La sala dal cussegl grond. RTR

Dapli transparenza gea - ma per tgi?

Il chantun Grischun duai survegnir ina lescha da transparenza che duai far pli simpel ad in e scadin da survegnir invista en documents uffizials. Quai propona la regenza al Cussegl grond. La lescha duai dentant valair be sin champ chantunal e betg per las vischnancas. Surtut en vischnancas pli pitschnas sappian ins immediat da tge persuna ch'i sa tractia en ils documents, era sch'ils nums vegnissan anonimisads. Ina minoritad da la cumissiun per politica statala e strategia propona dentant d'includer era las vischnancas en la lescha da transparenza.

Vias, punts, sviaments e tunnels...

La segunda gronda fatschenta da la sessiun da primavaira è il program da vias 2017-2020. En in rapport mussa la regenza quants daners che duain vegnir investids en tge vias, tge prioritads ch'i dat per las sanaziuns e per sviaments. Il Cussegl grond ha da pigliar per enconuschientscha quest rapport.

La sessiun da primavair dal cussegl grond cumenza glindesdi suentermezdi e dura enfin mesemna.