Siglir tar il cuntegn

Header

Navigaziun

Legenda: Guardar il video Trailer elecziuns. Durada 00:37 minutas.
Or da Telesguard dals 16.10.2015.
cuntegn

Chantun Tgi va per il Grischun a Berna?

En tut candideschan 70 persunas dal Grischun per in dals 5 sezs en il cussegl naziunal.

Ils Verd-liberals grischuns ston tremblar

En il Grischun stattan 4 dals 5 cussegliers naziunals a disposiziun per in’ulteriura perioda d’uffizi: Martin Candinas (PCD), Heinz Brand (PPS), Silva Semadeni (PS) e Josias Gasser (PVL).

Bain pussaivel dentant che questa cumposiziun sa mida: Tenor pliras retschertgas è surtut la Partida verd-liberala sut squitsch e pudess perder vuschs. Il cusseglier naziunal Josias Gasser sto pia tremblar per sia reelecziun – malgrà ch’ils Verd-liberals han collià lur glista cun ils socialdemocrats.

PPS cun bunas schanzas da restar la pli gronda partida en il Grischun

Da vart dretga cumbatta la Partida populara svizra dal Grischun suletta – ma ella ha bunas schanzas da restar la pli gronda partida en il Grischun. Il center politic ha unì sias forzas cun ina colliaziun da glistas da PLD, PCD e PBD. Cler è ch’ils Liberaldemocrats vulan recaltgar enavos lur sez ch’els han pers avant 4 onns als Verd-liberals. E la Partida burgais-democratica è la suletta che sto remplazzar ses cusseglier naziunal: Hansjörg Hassler (PBD) è il sulet da la delegaziun grischuna a Berna ch’è sa retratg.

Nagina tensiun empermetta l’elecziun dals dus cussegliers dals chantuns dal Grischun. Per ils dus sezs candideschan ils dus actuals Stefan Engler (PCD) e Martin Schmid (PLD).

Record da candidats en Svizra

Passa 5 milliuns Svizras ed Svizzers èn clamads a l’urna per eleger il parlament federal. E la schelta è gronda: 3788 persunas candideschan per in dals 246 mandats en il parlament federal. Quai è record – anc mai ha la Svizra dumbrà tants candidats per las elecziuns naziunalas.

Sin il current cun...

.. las emissiuns spezialas da RTR.

Radio Rumantsch a partir da las 12.00 uras

Telesguard a las 18.15 sin SRF info

En la rait:

sin www.rtr.ch,

facebook e twitter