Siglir tar il cuntegn

Header

Navigaziun

ina matta regala a la mamma flurs ed in buscuit
Legenda: Mammas lessan dapli che flurs e biscuits Era sch'il regal vegn da cor. Keystone
cuntegn

Chantun Tge vulan las mammas propi?

Il di da la mamma è vegni inventà da l’Americana Anna Jarvis l’onn 1905. La finamira era d’undrar las mammas e da tematisar problems da dunnas en la societad. Ozendi è la festa fitg commerziala. Mammas rimnan perquai giavischs sin twitter, tge ch’ellas avessan gugent che sa midass en la societad.

Las mammas na lessan betg tschigulatta, poesias, flurs u parfum. En las medias socialas, sut il chavazzin #muttertagswunsch, scrivan mammas, tge ch’ellas lessan propi, surtut da la societad, per ellas, per ils babs ed ils uffants. Per exempel medemas schanzas da carriera sco umens u dunnas senza uffants, pudair cumbinar meglier famiglia e professiun u insumma stima per la lavur prestada. Era giavischassan las mammas ina societad che acceptass meglier ils uffants, scolas alternativas ed abitaziuns da famiglia pajablas.

Era las Grischunas han giavischs

Era dunnas grischunas han giavischs a la societad. Che la lavur da la mamma vegniss stimada pli fitg, ch’i dess dapli spazi da giugar per ils uffants, e che las mammas na stuessan betg sa defender, sch’ellas van a lavurar, u betg.

Tge capita cun ils giavischs?

Che la societad dess dar a mintga mamma il sentiment dad esser ina buna mamma, quai è era in fervent giavisch en las medias socialas. Tut ils giavischs da las mammas e dals babs vegnan rimnai enfin mez matg, per suenter scriver ina brev averta a la regenza da la Germania.