Siglir tar il cuntegn
Inhalt

Chantun Tge è Halloween?

Blera glieud manegia, che la festa dals 31 d'october vegn da l'America. Ma quai n'è betg correct.

maletg da dus mascrai
Legenda: Mascras e costums tutgan tar Halloween sco sirup en l'aua. Keystone
Setgas cun grimassas.
Legenda: Tipica decoraziun da Halloween – las setgas cun grimassas. Keystone

Avant passa 2000 onns festivavan il Celts da l’Irlanda e da la Scozia mintgamai la fin d’october la finiziun da la stad ch'era da lez temp simbol per la vita. Vitiers beneventavan els l’enviern, il temp fraid – il temp da la mort.
Durant la notg dals 31 d’october sa regurdava la glieud dals morts. Els cartevan, ch’il mund tranter vivs ed morts sa maschaidia in cun l’auter.

Durant quella notg avevan ils spierts la schanza da vegnir giu sin terra e visitar ils confamigliars. Cunquai che tut ils spierts savevan visitar quella saira la terra, vegnivan er las nauschas olmas enavos en ils vitgs. Igl è lura daventà in ritual, da trair en costums e mascras durant quella notg per far tema a las nauschas olmas. Cun trair en da quests costums starmentus na duess la mort avair nagin interess da prender il vivs en l'enfiern. La glieud aveva numnadamain tema, che quellas olmas nauschas savessan prender possess dad els.

Pli popular en l'America

Ozendi è Halloween ina festa ch'è segir pli pauc populara tar nus ch'en l’America. Là vegn Halloween celebrà fitg. Uffants e creschids van da chasa a chasa cun costums e mascras per dultschims. Quai duess purtar cletg.

Ils usits dals immigrants europeics èn pia restads enfin oz sin il continent american ed han creà ina fatschenta da 7 milliardas dollars per onn. Uschia che Halloween vala sco la festa che procura per il segund grond gudogn finanzial suenter Nadal.

RR actualitad 11:00