A la testa dal moviment cunter la candidatura grischuna per gieus il 2022 era la cussegliera naziunala grischuna Silva Semadeni dalla Partida socialdemocratica (PS). Ed era tar la secund'emprova è ella da l'opiniun che gieus olimpics en il Grischun – u insumma en Svizra – fetschien dapli donn che quai ch'els portian.
Ella stoppia bain l'emprim anc studegiar en detagl il messadi, però è per Semadeni gia cler che gieus olimpics sajan adina in eveniment gigantesc. Ella dubita era da la duraivladad da l'infrastructura che stoppia vegnir bajegiada, u almain renovada e sanada ils proxims onns.
I dat in pèr bunas ideas. Però nus savain exactamain che gieus olimpics n'èn betg duraivels.
Pauc optimistica è Silva Semadeni pertutgant las infurmaziuns avant maun. Questas sajan anc memia pauc segiras. Saja quai ils custs, il traffic u la segirtad, tgi che saja la citad ospitanta, ubain era tge rolla che Turitg veglia giugar.
RR actualitad mezdi 11:00
