Tge cabina da telefon grischuna fa la pli auta svieuta?

Las generaziuns giuvnas pon gnanc pli sa regurdar vid las cabinas da telefon. Il telefonin ha fatg quellas quasi obsolet. Tuttina datti anc 150 da quellas en il Grischun. La meglera stat a Cuira.

Duas gabinas da telefon cun eschs da glas cun si il logo da la Swisscom.

Legenda da maletgs: Questa cabina è la pli lucrativa. La cabina a Cuira sin il plaz dals autos da posta sur la staziun. IO

La cabina da telefon cun la svieuta la pli pitschna da l'entira Svizra sa chatta en il Grischun en Val Calanca: A Braggio vegn mess ad onn CHF 1.40 en la bucca per la munaida da la cabina da telefon. Chapaivel cun l'avanzament dals telefonins.

Da 600 giu sin 150

Avant 20 onns existivan en il grischun anc 600 cabinas da telefon. Oz èn quai anc 150. Las cabinas vegnian sin il pli duvradas da turists, persunas che possedan actual nagin telefonin u da persunas estras che vulan telefonar a chasa cun buna qualitad, uschia il pledader da la Swisscom, Armin Schädeli.

Il telefon en ina cabina da la Swisscom

Legenda da maletgs: Il telefon en ina cabina da la Swisscom Il telefon posseda in display modern cun in cudesch da telefon digital. RTR, Ivo Orlik

La cabina cun la pli gronda svieuta è a Cuira

A Cuira tar il plaz dals autos da posta sur la staziun da tren stat la cabina che vegn duvrada il pli savens. Cun da quai da 50 telefons ad emna vegn fatg là la pli gronda svieuta. Quant precis che quai è na vul la Swisscom però betg publitgar.

Las cabinas da telefon èn ina part dal Service public e ston vegnir mantegnidas da la Swisscom. Mintga vischnanca stuess avair almain ina cabina da telefon.