Siglir tar il cuntegn
Inhalt

Chantun «Teslas stuessan avair il sound da Lamborghini»

El Fashion Outlet a Landquart han giasts pudì testar la fin d'emna il nov modell da Tesla - la marca d'autos electrics da la California. E strusch èn els puspè stads or da l'auto, han els gia gì in microfon avant il nas.

Il nov modell dal Tesla en cotschen stgir.
Legenda: Tesla a Landquart Per ina giada betg fashion, mabain in Tesla en l'outlet a Landquart: Ils giasts han pudì testar il nov modell da Tesla - l'auto electric da la California. RTR, Sabrina Bundi

Intgins dals testaders han verifitgà u dementì insaquants dals clischés che quai dat enturn Teslas ubain insumma, autos electrics. Per exempel quai pregiudizi: Teslas èn uschè quiets, ch'els èn in privel per il traffic. «Quai è uschia, atgnamain stuess ins montar vitiers in autpledader cun il sound dad in Lamborghini, lura fiss il privel bandegià», fa in um sgnoccas ch'è gist ì cun il Tesla.

Privlus saja er l'autopilot, è in auter clisché. Ils testaders dumandads èn perina, l'autopilot na saja betg privlus. Anzi, la tecnologia saja bleras giadas pli precisa ed attenta che l'uman.

Star a mesa via?

Per il Grischun na saja in auto electric betg adattà perquai ch'i manchia l'infrastructura - ils tancadis da chargiar. E lura as stettia tuttenina a mesa via. Uschia in ulteriur clisché. Quai na saja betg uschia, dian schizunt dus dals testaders: «Quai ha in tancadi a Maiavilla ed in a S. Murezi. Quai basta, perquai ch'il Tesla po ir 350 kilometers cun ina chargiada, uschia pon ins ir insaquantas giadas tras il Grischun.» E l'auter agiunta: «Mintgin ha il tancadi quasi a chasa, mintga damaun è l'auto tancà plain.»