Siglir tar il cuntegn

Header

cuntegn

Chantun TecDay – scienza en il focus

Scienza total a la Scola chantunala a Cuira: En 63 moduls han scolaras e scolars gì l’occasiun da s’approfundar en il mund da la perscrutaziun e l’industria. Ils Tecdays èn in’iniziativa da l’Academia svizra da las scienzas tecnicas (ASST), che vul dar uschia in’invista en las scienzas natiralas.

Co san sgular eroplans anc pli da lunsch e pli spert u nua sa daventar ficziun scientifica realitad? Dumondas, che professiunals da scienza natirala provan da respunder di per di en lur lavur. Co ch’els fan quai e pertge che quai è interessant han ils profis raquintà ed oravant tut era mussà oz venderdi a las scolaras ed ils scolars da la Scola chantunala.

Il TecDay ...

Avrir la box Serrar la box

... è in iniziativa da l’Academia svizra da las scienzas tecnicas (ASST). Quella sa cumpona dad ina rait da persunalitads, che s’engaschan dapi il 1981 per promover la tecnica a favur dal bainstar da la societad. L’Academia ha era l'incumbensa federala da promover l’interess e l’encletga per tecnica e scienzià natirala tar la giuventetgna.

S’avischinar a la neurobiologia – ina pussaivladad da 63

Uschia han 15 mattas e 5 mats survegnì tar la neurobiologa Valeria Eckhard ina prim ‘invista en il mund da la perscrutaziun da demenza. En ina curta part teoretica ha la scienziada declerà, co ch’il tscharvè funcziuna e tgeninas pussibilitads che la scienza ha, per chattar ora quellas funcziuns.

Suenter han scolaras e scolars pudì prender enta maun sez pipetta e mediums e sa deditgar directamain a la pratica da cultivar culturas da cellas.

Dad in’ura da pratica po resultar ina carriera professiunala

Franca Stucki da Flond è ina da las scolaras, che ha tschernì il modul neurobiologia. Suenter la curt’invista l’avantmezdi sa pudess ella sa metter avant bain, da tscherner il studi e lavurar sez en la perscrutaziun dal tscharvè.

Per ella e per tut las scolaras u ils scolars che vulan ir en quella direcziun ha la docenta Valeria Eckhardt in tip: «morder tras!». Quai haja fatg er ella – che seseva anc avant sis onns sez en ils bancs da scola da la Kanti a Cuira.

audio
Bunura: Di da tecnica e scienza a la scola chantunala: mattas vs. mats
ord Actualitad dals 27.02.2016.
laschar ir. Durada: 3 minutas 33 Secundas.

Avischinaziun als roms da MINT

Ils roms da MINT (matematica, informatica, scienzas natiralas e tecnica) interessan actualmain en tut ils secturs da la scolaziun – da la primara enfin en la scola politecnica, ha punctuà il rectur da la Scola chantunala, Gion Lechmann. La Scola chantunala a Cuira vul promover il gust vi da quests roms.

Il Tecday saja in ‘ulteriur pass per reducir la distanza tar il mund da la tecnica e scienza natirala.

Artitgels legids il pli savens