L'onn 1948 aveva il toc «Die Antigone des Sophokles» da Bertolt Brecht festivà premiera a Cuira. Uss, 70 onns pli tard, deditgescha il teater da Cuira in festival al dramaticher e liricher tudestg. Tar il festival tutgan tranter auter la preschentaziun dal toc «Die Antigone des Sophokles» ma er gieus auditivs dal teater giuven.
Brecht per las ureglias
Dals 20 da settember enfin ils 10 da november pon ins tadlar in gieu auditiv sin la plazza da teater Cuira ch'è realisà da giuvnas Grischunas dal teater giuven. In dals tocs raquinta l'istorgia da Charles Lindbergh, il giuven che sursgola l'Atlantic. Bertolt Brecht aveva scrit il text dal toc «Ozeanflug» l'onn 1929.
Per Annina Sedlacek, ina da las reschissuras èsi stà ina sfida da realisar in gieu auditiv. Perquai che qua sa basa tut sin tuns, suns, ramurs e las vuschs da las giuvnas. Ma pli ditg ch'ellas hajan exercità e pli bun ch'il sentiment per las rollas e la moda da raquintar saja vegnì, di Sedlacek.
RR actualitad 08:10