Taxas da cura e turissem: chantun cusseglia e controlla

Las taxas da cura e turissem procuran adina puspè per grondas discussiuns e dispitas en las vischnancas. Quels che ston pajar, surtut ils possessurs da segundas abitaziuns, sa sentan savens sco vatgas tge vegnan mulschidas.

La jugi a Scuol.

Legenda da maletgs: Tge libertads han las vischnancas? E tge pretenda il chantun areguard las taxas da cura? Keystone

Las vischnancas n’han dentant betg maun liber cur ch’i va per las leschas da taxas. A la fin sto adina la regenza approvar las novas leschas. Fixeschan las vischnancas per exempel taxas claramain memia autas, na conferma la regenza betg la lescha e quella na po betg ir en vigur uschia.

Per evitar da quests cas pon las vischnancas inoltrar in sboz da la lescha avant ch’il suveran decida. Uschia pon ins adattar la lescha a moda simpla avant che la lescha vegn avant il suveran ed ha ina tscherta segirtad, che la regenza vegn suenter ad approvar la lescha.

Dretg sin transparenza

Per dispitas procura savens la transparenza, co ils daners vegnan dads ora da la vischnanca ni la destinaziun. Tenor Toni Hess, manader dal servetsch giuridic tar l’uffizi da vischnancas e finanzas, han quels che pajan, era il dretg sin infurmaziun. Sch'ins n'è betg segirs che la vischnanca ni la destinaziun dat ora ils daners per l'intent fixà, han ins il dretg da vegnir infurmà, per tge ch’ils daners vegnan investids.