Siglir tar il cuntegn

Chantun Tar la PLD arda il fieu olimpic

La direcziun da la partida liberaldemocrata ha decidì da sustegnair ils gieus olimpics en il Grischun. Il project «gieus olimpics 2026» è vegnì preschentà la gievgia a la radunanza da delegads e ha survegnì in grond applaus. Tut auter èsi stà tar l'iniziativa per «l'abandun da l'energia nucleara».

Il cusseglier guvernativ Christian Rathgeb discurra durant ina radunanza.
Legenda: Il cusseglier guvernativ Christian Rathgeb ha preschentà als delegads il project gieus olimpics 2026. RTR, Fabia Caduff

Ils var 60 delegads da la PLD ch'èn stats preschents a la radunanza generala a Domat eran inchantads dal project dals gieus olimpics 2026 en il Grischun. Il cusseglier guvernativ Christian Rathgeb ha preschentà il project a la radunanza.

Dentant n'han ils delegads betg vuschà davart ina parola per ils gieus olimpics. Ma la direcziun da la partida ha decidì che la PLD sustegnia ils gieus.

Bruno W. Claus
Legenda: Bruno W. Claus è optimistic per ils gieus olimpics. RTR, Fabia Caduff
Per la PLD sa chapescha da sasez che nus stain davos la candidatura per ils gieus olimpics.
Autur: Bruno W. ClausPresident da la PLD grischuna e deputà Cussegl grond

Che la partida liberaldemocratica ha ina tenuta positiva envers ils gieus n'è betg ina surpraisa. La partida aveva era gia beneventà gieus olimpics 2022 en il Grischun. La dumonda dals gieus olimpics 2026 vegn per l'emprima giada ils 12 da favrer avant il pievel.

Persunas en ina sala che tegnan si il maun.
Legenda: Var 60 delegads èn s'inscuntrads la gievgia saira a Domat per la radunanza. RTR, Fabia Caduff

Energia nucleara

La PLD na sustegna betg l'iniziativa per l'abandun da l'energia nucleara. Cun 53 cunter duas vuschs ed ina abstenziun decida la PLD la parola na.Per ils delegads va la sortida da l’energia nucleara memia svelt e n'è betg coordinada avunda. Era vesan els cun la sortida ina dependenza da l’energia da l’exteriur ch'è colliada cun memia blers custs. Cun la decisiun suondan ils liberaldemocrats grischuns a la PLD svizra che ha era refusà l'iniziativa.

La votaziun davart l'energia nucleara è ils 27 da november 2016.

RR novitads 22:00