Siglir tar il cuntegn

Header

cuntegn

Survista da vischnancas Elecziuns e revisiuns

Diversas vischnancas han d'eleger lur gremis communals ed autras han da reveder parzialmain lur planisaziuns localas. Qua datti ina survista. Quella vegn adina puspè actualisada.

  • Vopna da Tavau
    Legenda: Tavau RTR

    Tavau

    Philipp Wilhelm (PS) è il nov landamma. El è vegnì elegì en in segund scrutini cun 2'164 vuschs. Ses contrahent, Peter Engler (PLD), ha fatg 1'960 vuschs. Plinavant ha il suveran da Tavau approvà cleramain la taglia da plivalur pli bassa tar enzonaziuns cun interess public spezial e dà a las pendicularas Rinerhorn il dretg da far diever da l'aua dal Rieberbach e dal Leidbach.

  • vopna Puntraschigna
    Legenda: Puntraschigna RTR

    Puntraschigna

    Nora Saratz Cazin è la nova president da Puntraschigna. Ella ha survegnì dapli vuschs che ses contrahent Gian-Franco Gotsch. Da l'actuala suprastanza communala èn elegids Diana Costa e Richard Plattner. Da nov èn suprastanza èn Peter Käch (604 vuschs), Mark Hulsbergen (513), Joel Schäfli (420) e Migg Lenz (380). Plinavant han ils da Puntraschigna detg Gea cun 572 vuschs cunter 47 Na ad ina nova cunvegna da prestaziun tranter la vischnanca e scola da musica Engiadin'Ota.

  • vopna Samedan
    Legenda: Samedan RTR

    Samedan

    Gian Peter Niggli da la PLD è il nov president communal da Samedan. Niggli survegn 740 vuschs tar in pli absolut da 566. Sia cuntracandidata, Franziska Preisig, ha survegnì 372 vuschs. Niggli è uschia successur da Jon Fadri Huder sco president communal. Er la suprastanza communala è cumpletta.

  • vopna Mustér
    Legenda: Mustér RTR

    Mustér

    Il suveran da Mustér di Na cun 57% da las vuschs a la nova via forestala da la Val Segnas fin la Val Sogn Placi. Il cussegl da vischnanca aveva approvà il credit da 3,9 milliuns francs per quest project. Quel era dispitaivel aifer la populaziun.

  • vopna Cuira
    Legenda: Cuira RTR

    Cuira

    Las votantas ed ils votants da la chapitala grischuna han detg Gea a tuttas fatschentas cun passa 82% da las vuschs: A la revisiun totala da la lescha da polizia dal 2008, a la reducziun da la cumissiun da furmaziun da 9 sin 7 persunas, al dretg da bajegiar terren per che la Scol'auta spezialisada dal Grischun (FHGR) po realisar ses nov center da scola ed al Türligarten, canorta d'uffants pitschens ed aula.

  • vopna San Murezzan
    Legenda: San Murezzan RTR

    San Murezzan

    San Murezzan di cleramain Gea a la revisiun da sia constituziun communala. Quai cun 753 vuschs cunter 256 vuschs. Cunquai vegn la constituziun pli simpla e cuntegna sulet anc l'urden fundamental. A la nova lescha davart ils dretgs politics han 764 votantas e votants detg Gea e 229 Na.

  • vopna da Favugn
    Legenda: Favugn RTR

    Favugn

    Il suveran da Favugn di Gea a l'adattaziun da la lescha da taglia communala. Plinavant approvescha el cleramain la revisiun parziala da la planisaziun locala nua ch’i va per determinar il spazi da las auas sin l'entir territori da la vischnanca.

  • Vopna da Domat
    Legenda: Domat RTR

    Domat

    La PCD resta la forza ferma en il cussegl communal. Dals 15 sezs occupescha ella da nov 5 (Philipp Ruckstuhl, Andrea Bäder Federspiel, Anita Decurtins-Jermann, Reto Spiller e Patrick Bargetzi), quai è in sez damain ch'enfin uss. Gudagnà in sez ha la PS, che ha uss 4 (Anita Caflisch Müller, Martijn Van Kleef, Christian Zimmermann e Luna Weggler). La PLD (Jürg Rodigari, Stephan Schwager e Rahel Hess) e la PPS (Ronny Krättli, Ruben Durisch e Stefan Theus) salvan mintgamai lur 3 sezs.

  • vopna Grono
    Legenda: Grono RTR

    Grono

    Ils candidats e las candidatas da la glista «Insieme» han cuntanschì 10 sezs, 5 sezs van a la glista «Nuova Grono». Per eruir il num dal 15avel commember hai num trair la sort tranter dus candidats da la glista «Nuova Grono». Omadus han survegnì 128 vuschs. Plinavant ha il suveran detg Gea cun 288 vuschs cunter 63 Na al credit da 1,55 milliuns francs per il mantegnair e per segirar il flum Calancasca. Gea han els era detg al mandat da prestaziun a la Regiun Moesa per administrar il register funsil dal circul.

  • Vopna Tusaun
    Legenda: Tusaun RTR

    Tusaun

    Tusaun approvescha tuttas trais fatschentas communalas. Il suveran di Gea a la revisiun parziala da la taglia sin ierta, a las mesiras per segirar l’equiliber finanzial e la revisiun parziala da la lescha da santeri e sepultura.

  • vopna Lumnezia
    Legenda: Lumnezia RTR

    Lumnezia

    La vischnanca Lumnezia di Gea cun 388 vuschs cunter 79 Na a la revisiun parziala da la lescha communala. Questa revisiun è necessaria perquai ch'il Cussegl grond ha approvà il favrer 2019 ina revisiun parziala da la lescha da taglia e da la lescha davart las taglias communalas e taglias da baselgia. En questas revisiuns vegnan unifitgadas las taglias sin ierta e donaziuns tranter chantun e vischnancas.

  • vopna Trun
    Legenda: Trun RTR

    Trun

    Il suveran da Trun ha gì d’eleger ils commebers dal cussegl da vischnanca. Elegids èn: Wendelin Decurtins, Rafael Guldimann, Claudio Scolieri, Flavio Tuor, Bruno Pfister, Claudio Thalmann, Flurina Bundi, Baseli Tomaschett, Rita Wolf, Marcel Flepp, Mario Lechmann, Andreas Küttel, Beat Pfister, Clemens Bundi e Adrian Defuns. La partizipaziun è stada tar 33,6%.

  • vopna Glion
    Legenda: Glion RTR grafica

    Ilanz/Glion

    Las votants ed ils votants dian cleramain Gea a la revisiun parziala da la planisaziun locala zona da commerzi Rueun. Quai cun 1'107 Gea cunter 149 Na. Uschia po la scrinaria en la fracziun da Rueun engrondir ses manaschi sper la via chantunala cun remisa, magasin e duas stanzas da deposit.

  • vopna Tujetsch
    Legenda: Tujetsch RTR

    Tujetsch

    Bunamain dus terzs da votantas e votants da Tujetsch vulan ina radunanza communal e desister dal cussegl communal. En la votaziun consultativa han 64,56% preferì questa varianta da l'organisaziun communala. 35,44% vulessen mantegnair il cussegl communal e desister da la radunanza communala. La votaziun consultativa hai dà per savair en tge direcziun reveder la constituziun communala. Dapi intgins onns sa fatschenta ina cumissiun cun questa revisiun e la finamira da simplifitgar las structuras politicas.

  • Vopna Vaz
    Legenda: Vaz RTR

    Vaz

    Il suveran da Vaz di Gea a la revisiun da las trais leschas. Uschia a la constituziun communala, nua ch'i va per augmentar il temp d'uffizi da las autoritads communalas sin quatter onns, a la lescha da taglia sco er a la lescha da firads publics. Ultra da quai han las votantas ed ils votants detg Gea a la vendita da l'anteriura chasa communala a Zorten, quai dentant be cnap cun 480 Gea cunter 475 Na. Approvà han els plinavant il budget 2021 ed il pe da taglia 2021.

  • vopna Scuol
    Legenda: Scuol RTR

    Scuol

    Cun clera maioritad da 83,9% Gea ha il suveran da Scuol approvà la planisaziun locala davart la determinaziun dal spazi d'auas. La vischnanca sto determinar il spazi da las auas (auals, flums e lais) sin l'entir territori communal sin fundament da la lescha federala davart la protecziun da las auas dal 2011. Uschia duain esser garantidas las funcziuns natiralas, la protecziun cunter auas grondas ed il diever da l'aua.

  • vopna Val Müstair
    Legenda: Val Müstair RTR

    Val Müstair

    Roman Oswald ed Ivo Lamprecht cumpletteschan la suprastanza communala. Els dus han fatg las pli bleras vuschs en il segund scrutini. Gia elegids en suprastanza communala èn Rinaldo Lechthaler, Guido Mittner, Daniel Pitsch, Patrick Wegmann e sco presidenta Gabriella Binkert Becchetti.

  • vopna Sumvitg
    Legenda: Sumvitg RTR

    Sumvitg

    Sumvitg n'ha anc adina nagina suprastanza communala cumpletta. Per l'ultim sez vacant han survegnì vuschs: Samuel Decurtins (Rabius, 34 vuschs), Flurin Berther (Rabius, 14) Ignaz Deplazas (Surrein, 11) e Patrick Schaniel (Sumvitg, 10). Ignaz Deplazes ha demissiunà da la suprastanza. Candidats uffizials n'hai dà nagins.

  • vopna Claustra
    Legenda: Claustra RTR

    Claustra/Serneus

    La vischnanca da Claustra lascha sclerir il manaschi da l'administraziun communala. Il suveran ha ditg Gea a l'iniziativa che pretenda ina inquisiziun (771 cunter 477). Quella pretenda da laschar sclerir sche l'administraziun communala è sa tegnida vi da sias cumpetenzas finanzialas e las raschuns per la fluctuaziun dal persunal en l'administraziun. En in segund scrutini èn vegnids elegids en il cussegl communal: Marcel Jecklin (612 vuschs), Selina Solèr (511 vuschs) ed Elizabeth Rüedi-Murchison (502 vuschs). Plinavant ha il suveran acceptà il preventiv 2021 ed il pe da taglia.

  • vopna da la vischnanca d'Arosa
    Legenda: Arosa RTR

    Arosa

    Il suveran d'Arosa ha approvà cun 655 cunter 423 vuschs la revisiun parziala da la planisaziun locala. Quella è necessaria per pudair cumplettar il hotel Vetter (datiers da la staziun da viafier e da la staziun a val da las pendicularas Weisshorn) cun in bajetg annex che pertutga il parcadi en il sid e duas parcellas cunfinantas. Per pudair realisar quest bajetg annex dovri ina midada en la lescha da bajegiar, ina midada dal plan da zonas, in plan general da furmaziun ed ina runcada da 259 meters quadrat.

  • vopna Roveredo
    Legenda: Roveredo RTR

    Roveredo

    Roveredo di Gea cun 427 vuschs cunter 106 Na al credit da 155'000 francs per il mandat da prestaziun a la Regiun Moesa per administrar il register funsil dal circul.

RTR votaziuns 2020

Artitgels legids il pli savens

Scrollar a sanestra Scrollar a dretga