Siglir tar il cuntegn
cuntegn

Chantun Survista d'expensas grazia a la tecnica

Bleras persunas pajan adina pli savens cun la carta EC ni da credit. Uschia po quai capitar svelt ch'ins perda la survista da las atgnas finanzas. Differentas bancas mettan a disposiziun in'applicaziun, in uschènumnà 'assistent da finanzas'. Quella duai gidar a tegnair sut controllas las expensas.

L'assistent tschaffa tuttas transacziuns, saja quai per mangiativas, fittanza u viadis.
Legenda: L'assistent tschaffa tuttas transacziuns, saja quai per mangiativas, fittanza u viadis. Banca Chantunala Grischuna

La banca chantunala porscha dapi mez settember in assistent da finanzas. Era autras instituziuns sco la UBS, la Raiffeisen e la posta fan diever da quella funcziun digitala.

Questa funcziun, ch’ins po duvrar cun l'app «GKB Mobile Banking» sur il telefonin sco era sur l'e-banking via computer, duess mussar visualmain, quant blers daners ch’ins dat ora e cunzunt – per tge. Per duvrar l'assistent da finanzas sin il telefonin ston ins dentant emprim activar quel sur il conto d'e-banking.

foto da Flavian Gieriet.
Legenda: Flavian Gieriet. mainagruppa dal contact center e-banking, Banca Chantunala Grischuna. RTR, Ivo Orlik

L'app analisescha automaticamain tut las transacziuns dals agens contos, saja quai cun las cartas da EC/credit, da pajaments permanents u dals daners retratgs da l'automat. Las expensas vegnan illustradas cun diagrams, di Flavian Gieriet, mainagruppa dal contact center e-banking da la BCG.

Tut arriva en ina rubrica

Vus cumprais en ina stizun da chalzers novs sneakers e pajais quels cun la charta. Las datas van lura direct en la rubrica 'shopping'. Al la fin dal mais pudais alura guardar, quants daners che vus avais dà ora per divertiment, per viadis, per restaurants etc. Uschia pudais vus avair en egl vossas expensas a moda simpla e survesaivla.

maletg d'ina analisa da expensas.
Legenda: Analisa d'expensas, da chattar en l'applicaziun da la Banca Chantunala Grischuna. GKB
maletg da budget da expensas.
Legenda: Far l'agen budget d'expensas, da chattar en l'applicaziun da la Banca Chantunala Grischuna. GKB

Be daners digitals vegnan tschaffads

Sch'ins paja cun bancnotas, lura na sa l'assistent natiralmain betg, en tge rubrica ch’ils daners tutgan. Lura va la summa simplamain en la rubrica 'daners/expensas bancnotas'. Quels che san per tge ch’els han dà ora las bancnotas pon pli tard anc adina categorisar las expensas en la rubrica giavischada.

A la fin resulta pia en il cas ideal in maletg detaglià da tuttas expensas.

RR actualitad 11:00