Siglir tar il cuntegn

Header

cuntegn

Suenter lungas debattas Finamiras & finanzas 2021-24 èn sut tetg

Igl è dumagnà: Mardi saira ha il Cussegl grond approvà cleramain il plan da finanzas 2021-24. Era il program da la regenza per ils proxims quatter onns han deputadas e deputads prendì per enconuschientscha – suenter ina debatta da circa 9 uras.

Daco dura la debatta uschè ditg?

Sin bunamain 150 paginas ha la regenza descrit 12 finamiras, formulà latiers 29 puncts da paisa, 98 mesiras ed illustrà la situaziun finanziala dal chantun. Tut quels puncts tracta il Cussegl grond in suenter l'auter e mintga deputada e mintga deputà po far dumondas a la regenza.

Per tge vai?

Per l'ina vai per las finamiras che la regenza vul cuntanscher ils proxims quatter onns. Ils temas centrals èn:

  • Digitalisaziun ed innovaziun
  • Green Deal
  • Chantun da muntogna multifar

Per l'autra vai per il plan da finanzas 2021-24, nua ch'il Cussegl grond dat avant las directivas finanzialas a la regenza.

Tge stat en il program da regenza?

La direcziun dat il Cussegl grond avant: Gia l'avust 2019 han deputadas e deputads fixà las finamiras politicas, che furman la basa per il program da regenza.

Plinavant valitescha la regenza ensemen cun la cumissiun da strategia la situaziun da basa en il Grischun – cun agid d'experts da l'universitad da Turitg.

Las 12 finamiras:

Personen-Box aufklappenPersonen-Box zuklappen
  1. Prestar servetschs sche pussaivel a moda digitala, esser in patrun attractiv e s'engaschar per finanzas durablas ed ina taglia moderata.
  2. Garantir la segirtad da la populaziun tar ristgs e privels che sa midan.
  3. Rinforzar il Grischun sco lieu da furmaziun e perscrutaziun.
  4. Posiziunar il Grischun sco lieu attractiv per lavurar, viver e sa recrear.
  5. Nizzegiar la varietad culturala e linguistica dal chantun sco schanza.
  6. Segirar in provediment da sanadad che correspunda als basegns e las pussaivladads da tgira actualas.
  7. Garantir per l'entir chantun ina mobilitad che correspunda als basegns.
  8. Prevegnir adequat a privels da la natira e proteger il clima.
  9. Mantegnair la muntada da la cultura, cuntrada e biodiversitad alpina.
  10. Pussibilitar innovaziuns e sustegnair la diversificaziun da l'economia.
  11. Sustegnair il svilup da las regiuns dal Grischun.
  12. Sustegnair la transfurmaziun digitala en il chantun.

Tge finamira ha la regenza per il rumantsch?

«La lingua e cultura rumantscha e taliana duain vegnir mantegnidas a lunga vista en il Grischun», scriva la regenza e reagescha uschia sin la critica dal Center per democrazia ad Aarau.

Per augmentar la preschientscha dal rumantsch e talian en l’administraziun chantunala, duai dar in post da coordinaziun cun il num «Administraziun plurilingua». Plinavant vul la regenza promover classas rumantschas/talianas en territoris tudestgs dal Grischun (p.ex. en la Vallada dal Rain).

Tge cumpiglia il plan da finanzas?

Il Cussegl grond decida las directivas aifer quellas la regenza po lavurar ils proxims quatter onns e tuttina tegnair l’equiliber finanzial dal chantun. Talas directivas èn per exempel:

  • Il deficit budgetà na dastga betg surpassar 50 milliuns francs
  • La taglia duai restar bassa en cumparegliaziun cun auters chantuns

Las finamiras fixadas en il program da regenza chaschunan custs supplementars da 60 milliuns francs ils proxims quatter onns. Plinavant è enconuschent ch’il chantun quinta ils proxims onns cun gronds deficits. Per tuttina avair enta pugn las finanzas, vul la regenza cun emprima prioritad examinar tut las incumbensas e prestaziuns dal chantun (ALÜ) e pir cun segunda prioritad vegniss in pachet da spargn en dumonda.

Tge decida il Cussegl grond?

Deputadas e deputads han be pudì prender per enconuschientscha il program da regenza 2021-24 – dentant betg pretender midadas concretas. Auter il plan da finanzas: Lez han deputadas e deputads approvà.

Tge din deputadas e deputads?

Video
Il Cussegl grond tracta il program da regenza 2021-24
Or da Telesguard dals 10.02.2020.
laschar ir

RTR actualitad 17:00

Dapli da Grischunavrir la Landingpage

Nach links scrollen Nach rechts scrollen