Siglir tar il cuntegn

Header

Navigaziun

chasa rumantscha cun persuna stilisada davanttiers
Legenda: Sch'i va tenor las candidaturas inoltradas fin ussa, lura vegn en mintga cas in um a succeder ad Urs Cadruvi sco secretari general da la Lia Rumantscha. RTR, Federico Belotti / grafica RTR
cuntegn

Chantun Successur dad Urs Cadruvi – Ils prims chanasters

La Lia Rumantscha survegn in um sco nov secretari general. Naginas dunnas sajan s’annunziadas per la plazza - ha confermà il president Johannes Flury sin dumonda da RTR.

Il temp d'annunzia per la plazza sco secretari general da la Lia Rumantscha è spirà. Specular tgi che pudess succeder ad Urs Cadruvi pon ins, ma Johannes Flury n'ha betg vulì tradir bler. Be tant – i sajan pli paucas che 10 annunzias. Tranter questas naginas dunnas.

Donn! Jau avess gì gugent annunzias da dunnas.
Autur: Johannes FluryPresident Lia Rumantscha

Nagin interess

Sin dumonda dad RTR han pliras persunas confermà ch'ellas na sajan betg s'annunziadas per la plazza sco secretari general: Andreas Gabriel (pledader Lia Rumantscha), Mariano Tschuor (SRG SSR a Berna), Claudio Spescha (SRF) ed Erwin Ardüser (RTR).

Blers giavischs e bleras pretensiuns

Il pli savens vegn giavischà ina persuna che cuntinuescha cun la lavur sco fin qua, p.ex. cun il cumpromis tranter RG ed idioms en scola. I na saja betg uschè relevant sch'il secretari general saja linguist u manager – pli impurtant saja in communicatur ch'enconuschia la scena rumantscha e che possia far punts.

Quai han era pliras uniuns rumantschas accentuà pli baud envers RTR.

Tgi che daventa nov secretari general e successur dad Urs Cadruvi, quai decida la suprastanza da la Lia Rumantscha probabel enfin la fin da favrer. Urs Cadruvi è stà dapi il 2007 secretari general.

Ils secretaris generals d'enfin uss da la Lia Rumantscha

1919 - 1932
Steafan Loringett
1932 - 1938
Andrea Schorta
1949 - 1954
Jon Pult
1960 - 1968
Giachen Giusep Casaulta
1968 - 1978
Hendri Spescha
1978 - 1980
Iso Camartin
1980 - 1980
Hans Caprez (elegì, ma sa retratg avant il cumenzament da l'uffizi)
1980 - 1997
Bernard Cathomas
1997 - 2007
Gion Antoni Derungs
2007 -
Urs Cadruvi

RR novitads 06:00