Siglir tar il cuntegn

Header

Navigaziun

Legenda: Guardar il video A Vitus Huonder duai in administratur apostolic suandar. Durada 01:16 minutas.
Or da Telesguard dals 24.10.2016.
cuntegn

Chantun Suandar Vitus Huonder duai in administratur apostolic

Per motivs da vegliadetgna vegn l’uvestg Vitus Huonder ad offrir al papa l'onn proxim sia demissiun. Il vicari general da la Svizra originara, Martin Kopp pretenda che la proxima elecziun da l’uvestg vegnia spustada per calmar la situaziun tendida en l’uvestgieu.

Il papa duaja enstagl nominar in administratur apostolic per in temp fixà. Quai ha ditg Kopp en in’intervista che las gasettas «Tages-Anzeiger» e «Bund» han publitgà. Quest administratur duess vegnir d'ordaifer ed avair il charisma da turnar al uvestgieu la fidanza e la pasch.

Kopp è fermamain dal maini ch'i na sappia betg ir vinavant sco enfin qua en l'uvestgieu a Cuira. El è da l'avis che l'uvestgieu saja uschè bun sco mort sch'i vegnia elegì insatgi da la gruppa che saja gia uss al timun a Cuira. Turitg e la Svizra originara na sajan betg pronts d'acceptar quai e sa tegnissan davent da Cuira.

L'uvestgieu a Cuira pateschia dapi decennis

L'avis ch'i dovria ina nov'entschatta per l'uvestgieu a Cuira vegnia partì lunsch enturn. El exprimi quest problem per ch'i vegnia era prì ver a Roma. El spera ch'i dettia scleriment e che la schientscha per la responsabladad turnia per l'uvestgieu che pateschia dapi decennis.

Mesira speziala, dentant betg nova

Pir il 2014 ha papa Benedetg il sedeschavel nominà in administratur apostolic. En l'uvestgiu Limburg en Germania ha quel surpiglià il post da l'uvestg Franz-Peter Tebartz-van Elst. Quai suenter che l'uvestg ha desistì da manar vinavant ses uffizi ecclesiastic pervia da la critica vid sia persuna entaifer ed ordaifer l'uvestgieu.

Tenor Urban Fink, il directur da l'ovra d'agid catolica Inländische Mission, ch'è stà sur 10 onns manader da redacziun da la Schweizerische Kirchenzeitung, haja in administratur apostolic tut tenor ils medems dretgs e pensums sco in uvestg. I dapendia dentant di papa. Lez nomineschia l'administratur apostolic e decidia tge obligaziuns ch'el haja, di Fink.

Dapi onns datti stentas da re-organisar l’uvestgieu da Cuira. Tranter auter cun stgaffir novs uvestgieus a Turitg ed en la Svizra originara. Huonder, ch'è conservativ ha da ses maun adina puspè chaschuna discussiuns. El aveva pretendì dad in pader a Bürglen UR da demissiunar, perquai ch'el aveva maridà in pèr dunnas lesbicas. Plinavant era el s'exprimì negativamain davart omosexuals a Fulda en Germania.

RR novitads 09:00