Siglir tar il cuntegn

Header

cuntegn

Chantun Stailas da Michelin – Caminada resta tar ils megliers

Andreas Caminada tutga puspè tar ils megliers cun il dumber maximal da trais stailas da Michelin. A Val hai dà ina surpraisa per l'ustaria «Silver» dal «Hotel 7132» che po salvar sias duas stailas. Ed a San Murezzan hai dà ina nova staila per il Grischun.

Per il «Schauenstein» a Farschnò ha Andreas Caminada puspè survegnì 3 stailas da Michelin, quai è la nota maximala. Ma er per ses dus restaurants «Igniv» a San Murezzan ed a Bogn Ragaz è Caminada vegnì onurà cun mintgamai ina staila.

Surpraisa per «Silver» a Val

Plitost ina surpraisa hai dà per il restaurant «Silver» a Val. L'ustaria po salvar sias duas stailas, quai malgrà ch'i ha dà ina midada dal schef-cuschinier. Mitja Birlo ch'ha surpiglià il matg il manaschi da Sven Wassmer è vegnì valità tuttina sco ses anteriur schef.

Ina nova staila per il Grischun va a San Murezzan e quai al «Hotel Kulm» cun il cuschinier tudestg Tim Raue.

Dumber da record

Tut en tut ha il guid da gourmet undrà quest onn 128 restaurants svizzers cun ina u pliras stailas. Quai è in dumber da record, scrivan ils organisaturs en ina communicaziun. Il dumber da restaurants che vegnan onurads cun duas stailas è creschì da 18 sin 20 cumpareglià cun l'onn avant. Ina staila han survegnì 105 restaurants, quai èn 21 dapli che l'onn passà.

RR novitads 06:00

Artitgels legids il pli savens