SRG SSR e RTR - Nathalie Wappler e Pius Paulin surpiglian posts da Heimgartner - Novitads

SRG SSR e RTR Nathalie Wappler e Pius Paulin surpiglian posts da Heimgartner

Nathalie Wappler, directura da SRF, è a partir dal 2020 vicedirectura generala SRG SSR. Ella surpiglia la funcziun da Ladina Heimgartner che banduna l'interpresa per la fin da l'onn. Pius Paulin surpiglia ad interim la direcziun da RTR, quai medemamain a partir dal schaner 2020.

Autur: CDM / Yvonne Simmen

En cunvegnientscha cun il cussegl d'administraziun SRG SSR ha Gilles Marchand, directur general SRG SSR, nominà Nathalie Wappler sco sia substituta. Ella surpiglia l'uffizi da vicedirectura generala SRG SSR da Ladina Heimgartner che banduna l'interpresa suenter bunamain 13 onns.

Nathalie Wappler ha cumenzà bain tar SRF. Jau m'allegrel ch'ella sustegna mai da nov er sco mia substituta. Nus vegnin a sa cumplettar bain – cunzunt en la Svizra tudestga.

Autur: Gilles Marchand Directur General SRG SSR

Pius Paulin directur RTR ad interim

Sin incumbensa da Gilles Marchand e Vincent Augustin, president da l'uniun purtadra SRG.R ha il cussegl d'administraziun SRG approvà la nominaziun da Pius Paulin sco directur interimistic da RTR. Paulin lavura dapi il 1987 tar la SRG ed è dapi il 1993 commember da la direcziun da RTR e manader da la partiziun tecnica. A partir dal 2020 è el directur ad interim.

Ladina Heimgartner mida tar Ringier SA

Ladina Heimgartner, directura RTR e vicedirectura generala SRG SSR, mida da la SSR tar la Ringier SA. Sco commembra dal comité directiv vegn ella a manar sut il CEO Marc Walder il nov «Corporate Center».