Siglir tar il cuntegn

Chantun SRG.R – Vincent Augustin succeda ad Oscar Knapp

L’advocat Vincent Augustin è il nov president da la societad purtadra da RTR, la SRG SSR Svizra Rumantscha (SRG.R). El daventa successur d’Oscar Knapp che terminescha sia perioda d’uffizi causa limitaziun da vegliadetgna la fin 2018.

Legende: Video Il nov president da la SRG.R: Vincent Augustin en discurs abspielen. Laufzeit 3:13 Minuten.
Or da Telesguard dals 28.05.2018.

Ils 26 da matg 2018 ha gì lieu en il Plantahof a Landquart la radunanza generala da la SRG SSR Svizra Rumantscha. En il center da la radunanza è stada l’elecziun dad in nov president per la SRG.R. Plinavant ha la directura da RTR Ladina Heimgartner infurmà sur da las fatschentas ed actualitads tar RTR.

Surdada dal premi SRG.R

Chor d'affons Sumvitg ha survegnì il premi SRG.R
Legenda: Chor d'affons Sumvitg survegn premi SRG.R. SRG.R

Ultra da quai è vegnì surdà uffizialmain il premi SRG.R 2018 al «chor d’affons Sumvitg» en renconuschientscha da l’engaschi per la cultura da chant. Persvadì ha la suprastanza da la SRG.R en spezial il grond engaschament da passa 50 buobas e buobs, ma er dals responsabels dal chor.

Nov president per la SRG SSR Svizra Rumantscha

La radunanza generala ha elegì Vincent Augustin sco nov president. Dr. iur. Vincent Augustin ha 62 onns e stat a Mon. El è tranter auter stà nov onns president da la Lia Rumantscha. Enfin il 2015 è el ultra da quai stà mainafatschenta da santésuisse Grischun e dapi quatter onns fa el numnadamain part da l’Autoritad da recurs independenta davart radio e televisiun, AIRR, u per tudestg UBI. Questa presidiescha Vincent Augustin dapi il 2016. Cun sia tscherna sco president da la SRG SSR Svizra Rumantscha vegn el però a dar giu quel presidi.

Vincent Augustin surpiglia il presidi SRG.R l’entschatta da schaner 2019. Sco president d’ina societad purtadra regiunala fa el part ex-officio dal cussegl d’administraziun naziunal da la SRG SSR a Berna. Quest cussegl d’administraziun vegn presidià da Jean-Michel Cina.

Ad Oscar Knapp, che sto remetter ses uffizi tenor statuts la fin da l’onn 2018 cunquai ch’el accumplescha 70 onns, è vegnì dà in «adia» cun in chor ad hoc.

Legende: Video Radunanza SRG.R abspielen. Laufzeit 2:07 Minuten.
Or da Actualitad video dals 26.05.2018.