Siglir tar il cuntegn

Header

audio
Saira: Vincent Augustin duai succeder ad Oscar Knapp
Or da Actualitad dals 16.04.2018.
laschar ir. Durada: 3 minutas 40 Secundas.
cuntegn

Chantun SRG.R: Vincent Augustin per Oscar Knapp

La suprastanza da la SRG SSR Svizra Rumantscha (SRG.R) propona Vincent Augustin sco nov president. La radunanza generala elegia ils 26 da matg in successur u ina successura per Oscar Knapp che sto remetter ses uffizi cunquai ch'el accumplescha 70 onns, communitgescha la SRG.R.

Vincent Augustin è advocat ed ha ses biro a Cuira. L'anteriur deputà dal Cussegl grond è tranter auter stà 9 onns president da la Lia Rumantscha. Enfin il 2015 è el er stà manader da fatschenta da santésuisse Grischun. Dapi quatter onns fa Augustin part a l'Autoritad da recurs independenta davart radio e televisiun AIRR (per tudestg UBI) e dapi il 2016 è el president da l'autoritad. Quest uffizi stuess el remetter, sch'el vegniss elegì sco nov president da la SRG.R.

Oscar Knapp è dapi il 2013 a la testa da l'uniun purtadra da Radiotelevisiun Svizra Rumantscha. El resta en il cussegl administrativ da la SRG SSR.

«RTR ed il rumantsch ma stattan a cor»

La gronda motivaziun da dir gea a la suprastanza da la SRG.R sajan stadas las grondas midadas che la scena da medias fetschia il mument, ha Vincent Augustin detg. Ultra da quai stettian RTR ed il rumantsch a cor ad el. Per il presidi da la SRG.R desistiss Augustin dal presidi da l’autoritad da recurs independenta davart radio a televisiun (UBI). La sfida actuala per la SRG.R, suenter avair cumbattì ferventamain l’iniziativa «No Billag», sajan ussa las mesiras da spargn – las consequenzas, per la SRG e per RTR.

Sco president da la SRG.R vuless el cuntanscher che RTR possia era en il futur crear contribuziuns per radio, televisiun ed online da buna ed auta qualitad. Quai per in public en il Grischun ed en l’entira Svizra. Impurtant para ad el er da porscher cuntegns attractivs per la giuventetgna, tant sco la concessiun lubeschia.

SRG.R

Avrir la box Serrar la box

Quai è l'uniun purtadra da Radiotelevisiun Svizra Rumantscha RTR. La suprastanza sa cumpona da tschintg persunas. Actualmain èn quai sper il president Oscar Knapp, Beatrice Baselgia (vicepresidenta), Gion Cola, Gion Lechmann e Donat Nay.

RR novitads 10:00

Artitgels legids il pli savens