Siglir tar il cuntegn

Chantun Spustar l’elecziun dal presidi da la Lia Rumantscha

En bun in mais è la radunanza da delegads da la Lia Rumantscha. 65 delegadas e delegads decidan lura sur da dumondas da la Lia Rumantscha. Ina da las tractandas las pli interessantas è l’elecziun dad in nov president u d'ina nova presidenta.

La Chasa Rumantscha a Cuira.
Legenda: La Chasa Rumantscha a Cuira. MAD

La Lia ha gist sezza tschertgà in successur per Duri Bezzola e preschentà ensemen cun la demissiun il nov candidat Johannes Flury. Per la Societad retorumantscha è quai ì memia spert. Cristian Collenberg avess giavischà dapli discussiun. Perquei vegn el u in auter delegà da la Societad retorumantscha far durant la radunanza da delegads la proposta da spustar l’elecziun dal presidi. Quai ha dentant anc in auter motiv: Collenberg vul era ch'auters candidats u candidatas possian sa participar. El haja era gia in candidat u ina candidata en mira, dentant na possia el anc betg dir da tgi ch’i sa tracta.

Fin la radunanza vai dentant anc in mais, ed jau sun optimistic che nus vegnin a survegnir sustegn. Nossa proposta è raschunaivla.
Autur: Cristian Collenberg

Las uniuns affiliadas regiunalas che tschentan 33 delegadas e delegads han dentant gia sincerà a Johannes Flury lur sustegn. Ed ellas stettian probablamain era tar questa decisiun, conferman ellas envers RTR. Dentant èn ils delegads era libers da decider tenor atgna opiniun. Quai dian er las uniuns affiliadas pitschnas. Ellas tschentan 32 delegadas e delegads. Dentant ear tranter las uniuns pitschnas han insaquantas gia sincerà lur sustegn per Johannes Flury. Tenor la situaziun actuala pudessi pia vegnir stretg per la proposta da la Societad retorumantscha.