Speculaziuns davart successiun en regenza cumenzan

Tgi pudess seser sin il sez da cusseglier guvernativ Martin Jäger e sin quel da Barbara Janom Steiner a partir dal 2018? Anc èsi memia baud da numnar nums, intgins deputads dal Cussegl grond han dentant gia tradì lur favurits.

Davent dal 2018 sesan dus novs cussegliers ubain cusseglieras guvernativas sin il banc da la regenza dal Grischun.

Legenda da maletgs: Il banc da la regenza dal Grischun A partir dal 2018 sesan dus novs cussegliers ubain cusseglieras guvernativas sin il banc da la regenza dal Grischun. RTR, D. Hardegger

Atgnamain èn els anc amez la legislatura - cusseglier guvernativ Martin Jäger e cussegliera guvernativa Barbara Janom Steiner. Dentant èsi lur ultima legislatura. Martin Jäger chala, tar Barbara Janom Steiner scada la limitaziun da temps d'uffizi.

Per numnar nums per lur successiun èsi anc memia baud, dentant curseschan en il foyer dal Cussegl grond tuttina gia intgins nums da candidats pussaivels. Per la successiun da Martin Jäger, il cusseglier guvernativ da la PS èn quai Sandra Locher Benguerel, Jon Pult ubain er Andreas Thöny. Els trais na sa laschan dentant insumma anc betg guardar en las chartas e na dian betg sch'els fissen interessads. Anc bler pli pauc sin il radar è ina successura ubain in successur per Barbara Janom Steiner, cussegliera guvernativa da la PBD. Dentant er qua è sta d'udir insaquantas giadas il num da Andreas Felix sco pussaivel candidat. Er el na tradescha anc nagut.

E segir e franc han er la PCD e la PLD gust sin in ultierur sez sin il banc da la regenza. Per chattar lura propi il favurit resta anc temps, las elecziuns da la regenza èn pir l'onn 2018.

RR actualitad 07:00