Siglir tar il cuntegn
Inhalt

Chantun Somedia e Basler Zeitung vulan collavurar

La Somedia e la Basler Zeitung èn vid far tractativas davart ina collavuraziun. Pertutgads da quella collavuraziun pudessan ils resorts naziunal, exteriur, economia e cultura esser - la part regiunala na fiss betg pertutgada.

dus bajetgs, a sanestra Somedia, a dretga Basler Zeitung
Legenda: Las duas gasettas discuteschan ina collavuraziun. Keystone

La Basler Zeitung BaZ che tutga per in terz a l'anteriur cusseglier federal da la PPS Christoph Blocher è en tractativas cun la Somedia che tutga a l'editur Hanspeter Lebrument.

Las discussiuns sajan gia pulitamain avanzadas, uschia Hanspeter Lebrument sin dumonda dad RTR. Co che la collavuraziun duai guardar or en detagl na vuleva el dentant betg tradir, quai na saja n'er anc betg cler.

Mo tant: I pudess pertutgar ils ressorts naziunal, exteriur, economia e cultura. Il ressort regiunal na fiss en scadin cas betg pertutgà.

Finamira è clera: Spargnar

Quantas plazzas che fissan pertutgadas da questa collavuraziun e quant bleras che vegnissan stritgadas na vuleva l'editur da la Somedia n'er betg tradir. Dentant saja la finamira cleramain quella da spargnar cun questa mesira.

Cura che la collavuraziun giaja en vigur saja anc avert. Ina collavuraziun vegnia dentant be en dumonda sch'il resultat dals discurs plascha tanta a la Somedia sco er a la Basler Zeitung.

Cura ch'il resultat da las tractativas è da spetgar na vuleva l'editur Hanspeter Lebrument betg dir.

Diversitad publicistica giess a perder

Ina collavuraziun tranter duas medias sco la gasetta Südostschweiz SO e la Basler Zeitung BaZ na fa betg surstar il professer per schurnalistica a la scol'auta ZHAW a Winterthur, Vinzenz Wyss. Las chasas da medias sajan sut squitsch e cumbattian per il surviver. Ina collavuraziun dettia in zic dapli aria per trair flad.

Tuttina deplorescha el questa idea d'ina collavuraziun pussaivla. Uschia tunassan temas naziunals, internaziunals ni er culturals tuttina a Basilea sco er en il Grischun. Per il lectur e la lectura giess la diversitad en il mund da medias a perder.

Concurrenza tranter editurs uss per finanzas e betg pli per cuntegns

Questa tendenza e concentraziun saja da vesair adina dapli. Uschia che la concurrenza tranter las chasas edituras saja sa midada:

Gia dapi 10 onn regia ina concurrenza economica e betg ina concurrenza publicistica tranter las chasas da medias.
Autur: Vincenz WyssProfesser per schurnalistica, ZHAW Winterthur

Mintga chasa da medias miria nua ch'ella sappia anc spargnar in zic dapli. Uschia ch'ils editurs tschertgan la collavuraziun cun auters. Quai che pateschia saja la diversitad e cun quella era la qualitad da las medias.

RR novitads 12:00++