Siglir tar il cuntegn

Header

video
Sprayada avant la curt da l'uvestg da Cuira
Or da RTR dals 17.08.2015.
laschar ir. Durada: 16 Secundas.
cuntegn

Chantun Smanatschas a letras grassas per uvestg Huonder

Suenter il citat da bibla dispitaivel che pretenda la paina da mort per omosexuals, na sa mussà betg mo il pledader da l’uvestg schoccà. Er las reacziuns d’auters èn vehementas: tranter auter ha l’uvestg survegnì ina brev cun en ina culla da pistola ed era avant «chasa» ha quai reacziuns.

Ch’igl è in temp da «crisa» per l’uvestg, Vitus Huonder, mussan las bleras reacziuns ch’igl ha dà suenter ses referat a Fulda en la Germana. El haja survegnì reacziuns vehementas per posta, ha confermà Giuseppe Gracia, il pledader e cussegliader da l’uvestg Vitus Huonder envers RTR. Tranter auter haja l’uvestg survegnì pliras «chartas da gritta» ed era ina brev cun en ina culla dad ina pistola.

«Ich mach jetzt Schluss mit dir»

Ed i dat era reacziuns directas avant «chasa» da l’uvestg Vitus Huonder. Nunenconuschents han sprayà cun colur pinca sin il mir che maina a la curt da l’uvestg da Cuira: «Lieber Vitus, ich mach jetzt Schluss mit dir, dein Jesus.»

Stgisa a tut ils omosexuals

Entant en era il vicari general Josef Annen ed il president dal cussegl sinodal Benno Schnüriger dal chantun Turitg vi d’empruvar da medegiar las plajas ch’il referat da l’uvestg Vitus Huonder ha chaschunà. En ina decleraziuns communabla scrivan els, ch’els sajan preoccupads che la reputaziun e la credibladad da la baselgia pudess subir donns tras decleraziuns da quest tip.

Annen e Schnüriger sa perstgisan perquai tar tut ils omosexuals e tar tut quels ch'èn grittentads – er tar la baselgia evangelic-refurmada. I saja impurtant da respectar auters models da vita, scrivan els.

Pledader è stà schoccà

Davart il referat a Fulda en Germania, ha ditg Giuseppe Gracia en l’emissiun «Tagesgespräch» da Radio SRF ch’el n’haja betg gì enconuschientscha dal text. L’uvestg Huonder haja scrit quel durant las vacanzas da stad. Uschia n’haja el sco pledader era betg pudì cussegliar l’uvestg en chaussa.

Giuseppe Gracia, il pledader da l’uvestg Vitus Huonder.
Legenda: Giuseppe Gracia, il pledader da l’uvestg Vitus Huonder. Keystone

«Figura cun responsabladad politica»

El saja stà «schoccà» co l’uvestg haja interpretà quest citat da la bibla, che pretenda la paina da mort per omosexuals – cunzunt da la frasa «[...] um der Frage der Homosexualität aus der Sicht des Glaubens die rechte Wende zu geben».

«L’uvestg è ina figura politica cun responsabladad politica», avessia el ditg a l’uvestg Vitus Huonder, sch’el avess gì la schanza da leger il text avant il referat. «Ussa va quai per limitar il donn», uschia Gracia. El restia loials a l’uvestgieu durant questa «crisa». Tut quai che pudess suandar, saja actualmain be speculaziuns.

Las raschuns

Durant in referat en la Germania aveva Huonder cità pliras passaschas or da la bibla nua che l'omosexualitad vegnia chastiada cun la mort. Quai aveva procura per grondas reacziuns. L’uvestg Vitus Huonder era sinaquai s’exculpà publicamain en ina brev.

Artitgels legids il pli savens