Siglir tar il cuntegn

Header

audio
Bunura: Computer emprenda rumantsch – Project «common voice»
Or da Actualitad dals 18.01.2020.
laschar ir. Durada: 2 minutas 48 Secundas.
cuntegn

«Siri: Discurra rumantsch!» Intelligenza artifiziala per rumantsch

Durant l'acziun da «72 uras» ha l'uniun Giuventegna Rumantscha GiuRu ensemen cun la Lia Rumantscha decidì da rimnar audios per rumantsch ensemen cun ils texts. Quest material pon ins lura duvrar per elavurar sistems da computer che duessan en avegnir er chapir rumantsch.

Durant 72 uras po la populaziun rumantscha ir a registrar texts rumantschs. Il mument entant be per sursilvan e vallader. La finamira è però ch'ins po en avegnir er registrar e rimnar texts en ils ulteriurs idioms sco er en rumantsch grischun.

Acziun «72 uras»

Avrir la box Serrar la box

«72 uras» è la pli gronda acziun d'organisaziuns da giuventetgna en Svizra. Tranter 15'000 e 20'000 giuvenils fan part da quella. En passa 300 projects fan els insatge per il niz public. 7 projects han lieu en Grischun.

Dapli da l'acziun

Sco emprim èn stada en acziun ils scolars rumantschs da la scola chantunala. Cun tablet, uregliers e microfon èn els sa mess vi da la lavur ed han registrà simplas frasas curtas senza connex. Scolars tranter 13 e 19 onns han prendì part al project. La GiuRu è fitg cuntenta cun ils resultats. Durant la fin d'emna èn lura er envidads tut ils auters Rumantschs ch'han gust da registrar frasas per rumantsch.

Era suenter las 72 uras pon ins anc registrar audios e text. Quai tut simpel sur la pagina d'internet da common voice.

Texts or d'audios

RTR è il mument vid in project che duess gidar tar las retschertgas en material pli vegl. Il problem è ch'ins ha en l'archiv massa material d'audio, per chattar quest material dovran ins però er il script tiers. Cun il project «speech to text» vulan ins ch'il computer chapescha il rumantsch en l'audio e sa transmidar quai en il text scrit.

audio
Bunura: Computer emprenda rumantsch – Project «speech to text»
ord Actualitad dals 18.01.2020.
laschar ir. Durada: 3 minutas 5 Secundas.

Per che quel program funcziuna en tut ils idioms ed er per rumantsch grischun dovr'ins per mintga idiom almain 50 uras material. Er il material che la GiuRu rimna vegn dabun a quest project.

RTR actualitad 07:00

Artitgels legids il pli savens