Siglir tar il cuntegn
cuntegn

Chantun Sinoda da Turitg pretenda pasch en l'uvestgieu da Cuira

Cun ina resoluziun ch'è vegnida approvada senza cuntravusch pretenda la sinoda da Turitg ina soluziun paschaivla per la dispita en l'uvestgieu da Cuira ed ina succesiun consensuala per l'uvestg Vitus Huonder.

Ina vista sin baselgias da turitg.
Legenda: La sinoda da Turitg represchenta legislativamain radund 400'000 catolicas e catolics en il chantun Turitg. Keystone

La resoluziun porta il titel «Noss quitads per l'uvestgieu da Cuira – nova schanza per l'avegnir». Ella pretenda ch'i vegnia elegì in successur per Vitus Huonder che saja bun da reconstruir la pasch en l'uvestgieu.

La persuna duai enconuscher la diocesa en l'uvestgieu, ella duai esser acceptada e lavurar ensemen constructiv cun las instanzas da las baselgias chantunalas. Quai scriva il Center da medias catolic en ina communicaziun.

La resoluziun dal parlament dals catolics da Turitg n'è betg l'unica pretensiun en questa direcziun. In'allianza da diversas organisaziuns catolicas pretenda cun ina petiziun d'installar in administratur apostolic empè d'in nov uvestg.

L'uvestg Vitus Huonder ha proxim onn 75 onns e sto perquai offrir al Papa sia demissiun.

RR novitads 17:00