En consequenza dal privel da lavinas èn pliras vias en Surselva vinavant serradas. Uschia las vias tranter Mustér e Disla, da Mustér a Cavardiras, da Sumvitg a Plaun da Crusch, la via da Rueun a Pigniu e la via tranter Versomi e Stussavgia. Serrads restan plinavant ils pass Lucmagn ed Alpsu.
Engiadina betg cuntanschibla cun auto
Las grondas quantitads da naiv han er fatg serrar ils pass dal Güglia tranter Beiva e Silvaplana. Nà dal nord n'è l'Engiadina uschia betg pli cuntanschibla cun auto. Er serrada è la via da Martina al cunfin sco er da Vinadi a Samignun. La Val Müstair n'è betg cuntanschibla via l'Engiadina cunquai che la via da Zernez a Tschierv è serrada. Tranter l'Engiadina'Ota e l'Engiadina Bassa na datti il mument nagina colliaziun cunquai che la via principala tranter Brail e Susch è serrada. Er en il Partenz èn pliras vias lateralas serradas.
Obligatori da chadainas
In obligatori da chadainas per autos senza tracziun da 4x4 vala per ils pass Bernina e Wolfgang sco er per las vias tranter Curvalda e Lai e tranter Langwies ed Arosa.
Interrupziuns da lingias da tren
La colliaziun tranter l'Engiadin'Ota e l'Engiadina Bassa è interrutta. Sper il traject tranter Cinuos-chel-Brail e Sagliains na van er sur il Alpsu nagins trens, pervi da privel lavinas. Bus enstagl da tren circuleschan tranter Sagliains e Scuol, sco era da Tavau a Casti.
9 uras senza electricitad
La regiun da St. Antönien en il Partenz è stada dapi la damaun fin il suentermezdi senza current electric. L'interrupziun oz haja pertutgà 350 chasadas - scriva la Repower. Damai che l'access a Sankt Antönien è bloccà pervi dal privel da lavinas saja in collavuratur da la Repower arrivà cun skis da tura al lieu. Là haja el pudì far la reparatura necessaria. L'um è vegnì accumpagnà d'in giud da muntogna dal CAS. Chaschunà l'interrupziun haja in rom ch'era crudà sin la lingia d'electricitad.
RR novitads 06:00++
