Sessiun da zercladur «magra»

Sin l'emprima egliada na porscha la sessiun da zercladur dal Cussegl grond betg bler: Naginas leschas da reveder, naginas decisiun spectacularas. Dentant, da discurrer vegn quai franc er quella giada a dar.

La sala dal Cussegl grond a Cuira.

Legenda da maletgs: La sessiun entschaiva A partir da glindesdi suentermezdi sesan las deputadas ed ils deputads e la regenza puspè en la sala dal Cussegl grond. RTR, D. Hardegger

Per trais dis sesan las deputadas ed ils deputads dal Grischun puspé en il Cussegl grond - dentant sin il programm da lavur na stattan naginas leschas da reveder ubain decisiuns pli dispitaivlas. Persuenter massa moziuns, dumondas ubain incumbensas per la regenza.

Ed er tar il rapport da gestiun e rendaquint da l'onn 2015 è la discussiun gia programmada - la PLD n'è numnadamein insumma betg cuntenta cun la summa ch'è vegnida investida per la scola. Dapi la nova lescha da scola ha quai dà custs supplementars da 25,6 milliuns francs. Planisads eran dentant be 4,5 milliuns supplementars.

Quantas vuschs?

Betg dispitaivel mabain simplamain interessant è er l'elecziun da Barbara Janom Steiner sco presidenta da la regenza. Ch'ella vegn elegida è cler, dentant è la dumonda tar elecziuns adina, quantas vuschs che Janom Steiner survegn. Tgi vul forsa dar ad ella ina piztgada ubain betg? Quai è per Barbara Janom Steiner la segunda elecziun sco presidenta dalla regenza, l'onn 2011 era ella vegnida elegida cun 98 vuschs.

RR Actualitad 12:00