Siglir tar il cuntegn

Header

audio
Mezdi: Siemis lucids – decider sez tge ch'ins siemia
Or da Actualitad dals 20.11.2019.
laschar ir. Durada: 3 minutas 39 Secundas.
cuntegn

Semiar lucid «Tar in siemi lucid è tut pussaivel»

Sgular tras l’aria u trair flad en l’aua n’è betg pussaivel en la realitad. En ils siemis percunter èsi nagin problem. Cunzunt tar in siemi lucid san ins entrar in mund fictiv, nua ch’i dat nagins cunfins. Per cuntanscher in tal siemi dovri la dretga tecnica.

Tamara Fingerlin (25) da Basilea ha studegià medischina e sa fatschenta dapi blers onns cun il siemiar lucid. L'emprima giada ha ella gì ina tala experientscha extraordinaria cun 12 onns. Dapi lura è ella fieu e flomma per quest tema. Avant 7 onns aveva ella perfin deditgà sia lavur da matura al siemi lucid ed ha gudagnà plirs premis cun sias perscrutaziuns. Tranter auter il premi da promoziun da «Schweizer Jugend forscht».

Tamara Fingerlin.
Legenda: Tamara Fingerlin è da l'opiniun ch'ins duess dar dapli paisa als siemis. MAD.

Ils criteris d’in siemi lucid

Blera glieud n’ha anc mai fatg experientschas cun in siemi lucid e na sa perquai betg s'imaginar co quai è. En emprima lingia ademplescha in siemi lucid trais criteris. Sco emprim èn ins conscients da la chaussa ch’ins è gist vid siemiar.

Durant in siemi lucid è tut pussaivel
Autur: Tamara Fingerlin experta per siemiar lucid

Vinavant èsi pussaivel da manar il siemi cun crear in agen mund fictiv ed il terz punct è ch’ins è medemamain conscient da tgi ch’ins è per avair nagina confusiun durant il siemi.

Danunder vegnan ils siemis?

Avrir la box Serrar la box

Tut en tut datti 3 fasas da sien che nus passentain durant la sien.

  • Fasa 1 da la sien: La sien da surfatscha signifitga ina sien ruassaivla ch'è dentant betg taissa.
  • Fasa 2 da la sien: La sien taissa. Là chattain nus la pli gronda recreaziun.
  • Fasa 3 da la sien: La sien da R.E.M (Rapid Eye Movement). Là vegnan las infurmaziuns dal di elavuradas ed i sa vegnir tar siemis. Plinavant è il corp paralisà durant questa fasa per che nus na executeschian betg ils moviments durant siemiar. Sulettamain ils egls e tschertas parts dal tscharvè èn alerts.

Viver pli conscient è il recept da success

Tenor Tamara Fingerlin è mintgin capabel da siemiar lucid. Be la tecnica è impurtanta. A principiants cusseglia ella sco emprim d’avair in cudesch da siemis, en quel scrivan ins si mintga regurdientscha dal siemi da la notg passada. Uschia construeschan ins ina meglra conscienza e memoria dals siemis.

Mintgin sa siemiar lucid
Autur: Tamara Fingerlin experta per siemiar lucid

Medemamain èsi dad esser pli conscient durant il di. En differentas situaziuns pli extraordinarias duajan ins pliras giadas il di sa tschentar la dumonda: «Sun jau gist vid siemiar?» Quai èsi da repeter. Insacura cura ch’ins dorma, vegn il tscharvè automaticamain a sa tschentar questa dumonda. Quai è il punct, cura ch’ins sa sveglia durant il siemi.

RR actualitad 11:00

Artitgels legids il pli savens