Per ils proxims dis prognostitgeschan ils meteorologs vinavant aura da stad cun temperaturas fitg autas. E cunquai s'augmentia il privel per incendis da guaud vinavant, communitgescha l'uffizi per guaud e privels da la natira.
Tut ils plazs da grillar en ed en il conturn dal guaud na dastgan uschia betg pli vegnir duvrads. Pir sch'i plova intensivamain durant plirs dis saja da quintar che la situaziun sa calmia.
Privel en l’entira Svizra
Pervi da la perioda da chalira actuala crescha il privel d'incendis da guaud en l’entira Svizra. En la regiun dal Lai da Bienna ha ars ier radund ina hectara guaud. Il fieu saja rut ora pervi da sbrinzlas tar lavurs da resgiar laina, communitgescha la polizia. L'incendi saja però vegnì dumagnà sut controlla ed i n'haja dà nagins blessads.