Siglir tar il cuntegn
Inhalt

Chantun Scolars e scolaras dal Grischun san bain englais

Il chantun Grischun ha laschà examinar las cumpetenzas d'englais dals scolars e las scolaras en Grischun.

Ina stanza da scola e davant in recipient cun ina bandiera da la Gronda Britannia.
Legenda: L’instrucziun d’englais en las scolas grischunas è in success. La maioritad dals scolars adempleschia las prescripziuns dal plan d’instrucziun. Keystone

L’instrucziun d’englais en las scolas grischunas è ord vista da l'Uffizi per la scola populara in success. La maioritad dals scolars adempleschia las prescripziuns dal plan d’instrucziun, scriva l'uffizi. Quai demussa il rapport da l’institut per evaluaziun da la furmaziun da l’universitad da Turitg. L’institut ha examinà las cumpetenzas dals scolars a la fin da l’otgavel onn da scola.

Cumpetenzas cumparegliablas cun l'ulteriura Svizra

Radund 1500 scolars da l'entir chantun Grischun han gì da far differents tests d'englais sco per exempel da tedlar e chapir, discurrer e scriver. Ils resultats dals tests sajan congruents cun studis cumparegliabels en auters chantuns da la Svizra. Quai saja allegraivel, sch'ins tiria en consideraziun ch'intgins chantuns impundian dapli lecziuns per l'instrucziun d'englais, scriva il chantun.

Scolars da lingua estra èn megliers en englais

Il studi mussa che las scolaras ed ils scolars da lingua tudestga e rumantscha cuntanschan cumpetenzas cumparegliablas. Percunter èn las cumpetenzas dals scolars en las regiuns talianas in pau pli bassas en tadlar e chapir. Plinavant mussa il rapport che scolars da lingua estra cuntanschan en tut ils tests megliers resultats che scolaras e scolars che han lur emprima lingua sco lingua da scola. Sco uffants da lingua estra valan uffants da famiglias immigradas u uffants che discurran sco emprima lingua ina lingua chantunala, ma betg la lingua da scola.

RR novitads 09:00