Siglir tar il cuntegn

Chantun Scola elementara Puschlav gudogna «Concurrenza scola e cultura»

Il chantun Grischun ha premià per la segunda giada la «Concurrenza scola e cultura». Gudagnà la concurrenza ha il project «Sprachen im KOchtoPF» da la scola elementara Puschlav.

La chasa da scola a Poschiavo.
Legenda: L'emprim premi per la «concurrenza scola e cultura 2017» va en il Puschlav. RTR, Anna Caprez

Tochen la fin d'october han ils scolars grischuns gì la pussaivladad d'inoltrar projects d'art e cultura che las scolas han realisà durant ils onns da scola 2015/16 e 2016/17. Part da la giuria han fatg Margrit Darms-Landolt, commembra da la cumissiun chantunala per promover la cultura, Luca Maurizio, magister ed artist, ed Armon Fontana da la promoziun da cultura dal Grischun.

Puschlav gudogna cun «Sprachen im KOchtoPF»

L'emprim premi da 3'000 francs va al project «Sprachen im KOchtoPF» da las suandantas scolas: Scola elementara Puschlav, sedia Puschlav (6. classa primara), scola elementara Puschlav, sedia San Carlo (1. classa primara), scola elementara Vicosoprano (4. e 5. classa primara), scola Malögia (1. fin 6. classa primara).

Ulteriurs premis van en Lumnezia ed a Vaz/Lai

Il segund premi ch'è dotà cun 2'000 francs survegn la 3. classa dal stgalim superiur da la scola Lumnezia, Vella. Els han inoltrà il project «Ängste im Alltag». Ed il terz premi da 1'000 francs survegn la scola communala Vaz, scola Lai (scolina, classas primaras, classas dal stgalim superiur). Ils scolars da Vaz e Lai han inoltrà in project che cumpiglia pliras spartas cun il titel «Menschlich – Mensch sein – As menschalat».

La surdada da l'emprim premi ha lieu mesemna, ils 24 da schaner 2018 a Poschiavo. Il schef dal departament d'educaziun e cultura e protecziun da l'ambient Martin Jäger vegn ad esser preschents.

RR novitads 09:00

Project «Scola e cultura»

Il nov project dal chantun Grischun «Scola e cultura» duai permetter als uffants ed als giuvenils grischuns in access multifar ad ina vasta chapientscha da la cultura. Ils scolars duajan survegnir baud gust da la cultura.