Siglir tar il cuntegn

Header

cuntegn

Chantun Schluein Glion - la naziunala austriaca ha blers giavischs

L’equipa austriaca vul trenar davos ils sumbrivals. Be l’entschatta dal trenament dastgan schurnalists persequitar il trenament a Schluein en la «Raiffeisen Arena Crap Gries».

Cura ch'i va per tactica na vul Marcel Koller betg laschar mirar en las chartas. I dovra ina saiv cun paravista enturn l'entir plaz, quai è ina da las pretensiuns che sto vegnir ademplida. Per Simon Lutz il president dal club da ballape da Schluein/Glion è quai senz'auter realisabel. I sajan simplamain fitg blers meters quadrat e quai saja ina dumonda da custs. Per quests custs segna l'Arena Alva sco organisatura da quest event.

A l'Arena Alva èsi reussì d'ospitar l’equipa naziunala da l’Austria davent dals 22 fin ils 30 da matg a Laax, cun il trenament da ballape a Schluein.

Mintga detagl sto constar

Simon Lutz
Legenda: Simon Lutz è losch dastgar beneventar l'equipa naziunala da ballape austriaca a Schluein RTR, L. Livers

In auter giavisch da l’equipa naziunala austriaca è la lunghezza dal pastg sin il plaz da ballape. Els giavischan il pastg uschè curt che Simon Lutz ha dubis, sche quai è insumma pussaivel. En mintga cas vegnan els ad empruvar d'ademplir era quest giavisch. Il pastg possia dentant vegnir scursanì mo en pliras fasas, per betg donnegiar el.

In terz giavisch da la naziunala da l'Austria è, ch'els possian installar lur atgnas maschinas da trenament da forza. Era qua ha Simon Lutz la schliaziun. La susta veglia dals stabiliments a Crap Gries vegn modifitgada uschia che quai avess da funcziunar, manegia el.

audio
Bunura: Camp da trenament a Schluein – ils giavischs austriacs
ord Actualitad dals 07.03.2016.
laschar ir. Durada: 3 minutas 47 Secundas.

Gieu amicabel

La pli gronda onur per il club da ballape da la secunda liga da Schluein Glion è dastgar dar in gieu amicabel encunter l’equipa naziunala da l’Austria. A quest gieu han era aspectaturs access. I vegnia a dar ina festa da ballape, manegia Simon Lutz.

Artitgels legids il pli savens