Siglir tar il cuntegn
Inhalt

Chantun Schlegel e Rathgeb stattan davos lur glieud

La polizia chantunala, pli exact ina truppa speziala, haja arrestà il whistleblower Adam Quadroni sin moda violenta. Quai è la renfatscha. Il cusseglier guvernativ responsabel, Christian Rathgeb, stat davos ses collavuraturs. I vegnia dentant sclerì internamain l'agir da la polizia.

Legende: Video Schlegel e Rathgeb stattan davos lur glieud abspielen. Laufzeit 02:20 Minuten.
Or da Telesguard dals 27.04.2018.

Christian Rathgeb na possia dentant dir nagut quant lunsch che questas examinaziuns internas sajan. Per el saja impurtant che las renfatschas vegnan scleridas, uschia di Rathgeb, cusseglier guvernativ da la PLD . Davart quest cas concret (l'arrestaziun dad Adam Quadroni che vegn descritta dal magazin «Republik») na prendia el il mument betg posiziun cunquai ch'il proceder na saja anc betg terminà.

Privel per Quadroni e terzs saja stà avant maun

Il cumandant da la polizia e candidat per la regenza grischuna da la PPS, Walter Schlegel declera che l'acziun da polizia saja vegnida fatga cun ina truppa speziala da la polizia perquai ch'i haja dà indizis per in privel per Quadroni sez, ma er per autras persunas. Danunder che las infurmaziuns davart Quadroni èn vegnidas n'ha Schlegel betg tradì. Plinavant declera Schlegel che Quadroni na saja betg vegnì arrestà mabain mess en fermanza.

Inoltrà recurs da surveglianza

Dapli pudeva dentant er Walter Schlegel betg dir, cunquai ch'i dettia er in recurs da surveglianza tar il chantun ch'è vegnì dad Adam Quadroni. Pervi da quest recurs sto uss tut anc ina giada vegnir examinà en detagl, avant ch'ins possia dar or infurmaziuns. Tuttina punctuescha Walter Schlegel ch'el haja fidanza absoluta che sia glieud haja agì a moda correcta, qua stettia el totalmain davos ses collavuraturs. Tuttina saja uss da sclerir tut a moda schubra.

RR novitads 15:00