Siglir tar il cuntegn

Chantun Sanadad psichica en la famiglia

La campagna «Co vai cun tai?» envida la populaziun grischuna da discutar dapli davart la sanadad psichica. L'accent da la campagna da quest onn è mess sin la sanadad psichica en la famiglia.

Ina famiglia sin in prà.
Legenda: La campagna «Co vai cun tai?» metta l'accent sin la sanadad psichica en famiglia. Colourbox

Mintga segund uman daventa ina giada en sia vita psichicamain malsaun. Sch'il bab, la mamma u in dals uffants daventa psichicamain malsaun, lura pertutga quai l'entira famiglia. La campagna «Co vai cun tai?» dal chantun Grischun metta perquai quest onn l'accent sin la sanadad psichica en la famiglia.

Discurrer avert cun ils uffants è fitg impurtant

Tscherts geniturs vulan schanegiar lur uffant ed eviteschan da discurrer cun el davart problems psichics. Per l'uffant n'è quai nagin servetsch. Uffants sentan, sch'insatgi perda l'equiliber – saja quai tar sasez, tar la mamma, tar il bab u tar in fragliun. Els dovran persunas creschidas che discurran cun els davart la malsogna e che sustegnan els da chattar ina pussaivladad dad ir enturn cun quella. Famiglias ch'han ina buna rait sociala e ch'èn disadas da discurrer en famiglia e cun terzas persunas sur da difficultads, pon surmuntar pli bain crisas.

Project da teater per scolars e scolaras

L'uffizi da sanadad ha engaschà per ils 26 da settember 2017 la producziun da teater da Basilea «Je suis Cinderella» a Landquart per classas da scola grischunas. Var 750 scolaras e scolars han là la pussaivladad da s'occupar intensivamain cun il tema «sanadad psichica en la famiglia». Cun la paraula «Tschendrina», che vegn inscenada da maniera moderna e confurm al temp, pon persunas d'instrucziun sa deditgar cun lur classas als temas resilienza, mobing, famiglia da patchwork e stima.

Campagna da placats

Ensemen cun ils servetschs psichiatrics dal Grischun, cun l'ospital chantunal dal Grischun e cun la psichiatria d'uffants e da giuvenils dal Grischun mussa l'uffizi da sanadad a partir dals 18 da settember 2017 la campagna sin placats gronds ed als moniturs da reclama en ils bus.

RR novitads 10:00