Siglir tar il cuntegn
Inhalt

Chantun RTR sin via tar Vus ad Andeer

Ils 29 d’avrigl fin l’emprim da matg è RTR sin via tar ses public ad Andeer a l’exposiziun MUMA cun in vehichel tut spezial, cun la «Microlotta». RTR va a la tschertga da las Rumantschas e dals Rumantschs en l'entir Grischun e preschenta sia purschida multifara da radio, televisiun ed online.

Il bus «Microlotta» da RTR.
Legenda: Ils visurs dal bus mussan diversas emissiuns, datas e facts e la pagina da Facebook e Twitter da RTR. RTR

En il center da la roadshow stattan il barat ed il dialog cun il public. Visitadras e visitaders pon participar activamain al program, dar in resun, prender part a la concurrenza ed emprender d’enconuscher las collavuraturas ed ils collavuraturs. A partir dal mars 2016 gira la «Microlotta» tras il Grischun e sa ferma tranter auter era en lieus forsa betg exnum tipic rumantschs, ch’èn dentant daventads in dachasa per bleras Rumantschas e blers Rumantschs.

Ina purschida multifara

La punt dal bus è equipada cun infrastructura d’audio, video e multimedia. Sin in dals visurs pon ins observar la moderatura en il studio dal Radio Rumantsch, dar ina baterlada ubain plazzar in giavisch musical.

Microlotta - in num tut spezial per il bus

Il public da RTR ha gì la pussaivladad da sa participar a la concurrenza per in num dal bus. Via rtr.ch, telefon, Facebook e Twitter èn vegnidas inoltradas entaifer trais dis 110 propostas creativas. Gudagnà ha Gion Cahenzli da Turitg cun il num «Microlotta».

Nus ans legrain da Vossa visita:

  • dals 29-04 enfin ils 01-05-2016 - Andeer: MUMA
  • dals 04 enfin ils 05-06-2016 - Lai: festa da musica districtuala
  • ils 12-06-2016 - Flem: festa da lutga chantunala dal Grischun e da Glaruna
  • dals 19 enfin ils 21-08-2016 - Cuira: festa da la citad
  • dals 16 enfin ils 17-09-2016 - Mels: Pizolpark
  • dals 10 enfin ils 11-09-2016 - Jenins: festa da vin
  • dals 13 enfin ils 16-10-2016 - Glion: Ilhga