Siglir tar il cuntegn
cuntegn

Chantun RTR publitgescha ses custs per emissiuns

Sco emettur da la SRG SSR publitgescha era Radiotelevisiun Svizra Rumantscha (RTR) ils custs per emissiuns da la «Televisiun Rumantscha» e da la chadaina da radio «Radio Rumantsch». Ina survista dals custs d’emissiuns datti sin rtr.ch/custs.

ina persuna cun in quintader, davostiers ina gronda televisiun
Legenda: Tuttas interpresas da l'SRG publitgeschan lur custs da las emissiuns. RSI

Tar la preschentaziun dals custs s’orientescha RTR a las expensas che sa resultan directamain da la producziun d’ina emissiun. Latiers tutgan ils custs per prestaziuns redacziunalas e tecnicas dal persunal sco era meds da producziun sco p.ex. ils studios, cameras, plazs da montascha, microfons u chars da producziun. RTR publitgescha ils custs da tut ils formats da televisiun sco era ils custs da la chadaina da radio «Radio Rumantsch».

Per far transparent ils custs ha RTR endrizzà ina pagina cun infurmaziuns sur da las singulas emissiuns sco era la dimensiun dals custs. Tar las indicaziuns dals custs sa tracti dals custs effectivs per las emissiuns da l’onn 2015, sa basond sin il quint annual. En l’avegnir vegnan las datas actualisadas mintg’onn, adina suenter il rendaquint da l’onn precedent.

Las indicaziuns detagliadas sur dals custs per emissiuns en publitgadas sin www.rtr.ch/custs.

Era las unitads d’interpresa da la SRG SSR – SRF (Svizra tudestga), RSI (Svizra taliana) e RTS (Svizra romanda) – vegnan a communitgar en detagl lur custs da producziun.
Ils custs e profils da program da SRF, RTS e RSI pon ins dumandar giu cun ils suandants links:

RR novitads 11:00